Panghambog ni Quiboloy

Daghan ang nagyam-id kang Pastor Apollo Quiboloy tungod sa iyang panghambog nga siya ang nagpahunong sa dakong linog didto sa Central Mindanao nga mikalas og pipila ka kinabuhi ug miguba sa daghang edipisyo.

Tiaw mo bang sa ka seryoso ug kadako sa maong kalamidad human sa sunodsunod nga pagtay-og, nakuha pa sa pastor ang makapanghambog. Ambot kun tinuod ba kaha kadtong iyang gianunsiyo or komediya ba lamang.

Kon sa iyang pangagpas tinuod gayud nga siya ang nagpahunong sa mga linog, unsa na gayud kaha ka gamhanan si Pastor Quiboloy? Ug basin baya kun tinuod gayud ang iyang gipanghambog nga siya ang anak sa Ginoo.

Ug kon komedyo kadtong iyang gianunsiyo, klaro gyud nga wrong timing ang mao nga pasiaw. Siaro sa ka grabe ug ka seryoso sa maong mga panghitabo nga mimugna og dakong kadaut didto sa Mindanao, nakuha pa ni Quiboloy nga mangomedya.

Mas angay pa unta nga gianunsiyo sa maong pastor ang panawagan ngadto sa iyang mga sumusunod ug sa nasyonal ug internasyonal nga komunidad pagtabang niadtong mga biktima sa halapad nga trahedya.

Kini aron nga matabangan dayon ang maong mga biktima kinsa nagkinahanglan karon og mga pagkaon, tubig og mga gamit sa ilang evacuation centers. Ug napuslan unta ang maong anunsiyo sa maong pastor.

Karon, minugna na hinuon og dakong kontrobersiya ang iyang panghambog nga siya ang responsable sa paghunong sa maong linog. Gituyo ba kaha kini ni Quiboloy aron nga moani og dugang sumusunod ang iyang relihiyosong organisasyon?

Ambot kun matag-an ba pud kaha ni Quiboloy kun kanus-a moigo ang sunod nga linog. Anak man kaha siya sa Ginoo. Kay kun iyang matag-an ang sunod nga linog, nan iya usab nga responsibilidad ang pag-warning sa katawhan sa pagpangandam.