Car-watch boys sa simbahan hasol

Kada Miyerkules mapuno gyod sa nagkadaiyang four wheels ang parking lot sa Redemptorist Church, timaan nga sagad sa manimba, nanagdalag  kaugalingong sakyanan.

May ubay-ubay nang guwardiya ang maong simbahan kang kansang obligasiyon, apil na ang pagtan-aw unsa ka luwas (safety) ang kahimtang sa namarking nga sakyanan. Apan dinhi nagpasad usab ang pipila ka car-watch boys, kinsa alang sa kadaghanan, sila wala na kinahanglana.

Adunay higayon nga sa pag-parking, walay car-watch boy nga miduol. Nagustohan kini sa tag-iya kay nahimong walay sagabal ang pagpahimutang sa iyang sakyanan.

Naeksperensiya sa mga car owner, nga inig pauli nila, mao pa lang gani paglingkod sa drayber atubangan sa manobela, may magdagan nang car-watch boy nga mopasangil pag-ayuda sa pagpalarga. Pero ang tinuorayng tumong mao ang hilom nga paningil sa unsolicited nilang serbisyo.

Tinuoray, dili sila mangayo. Tuod, magpaabot lag pilay itunol. Pero kon tunolan lang nimog tibuok P5 nga sensilyo, sa imong likod sila magbagutbot. May nadunggan gyod kong higala sa car-watch boy nga sa akto mikablit-sulti sa naulahi: “Dong, si Mr. X mogawas na, oh! Dalia, kay P20 pesos, pataas, gyod baya nang mohatag!”

Nakalingolingo ko sa akong nasaksihan. Hunahunaa lang. Kon ang tanang moparking mohatag og ingon niining kantidara, kadako uroy sa ilang masapi? Tingale, lupigon pa suweldo sa mga security.

Niadtong Oktubre 30, Miyerkoles, tapos sa alas 6:00 sa buntag nga misa, nasinati nako ang garapalang taras sa usa ka car-watch boy, kinsa mikalit lag tunga likod sa akong sakyanan dihang misugod na kog atras.

Sagad, bisag wa ko kauyon ning ilang estilo, maghatagan gyod ko nilag P10 coin. Naatol lang, niadtong tungora nahutdan kog sensilyo. Busa, gipaubos ko akong bentana ug mao pay mihangyo: “Dong, wala man koy sensilyo, uy! Sa sunod na lang, ha?” Mahigalaon kong pasabot.

Apan naunsa ba, nga gitubag man hinuon kog: “Modawat man mig tibuok!” Hala, no?

Dinhi namatud-an nga ilang gianhi dinhi sa Redemptorist Church dili aron mobantay sa mga namarking nga sakyanan.  Kondili, nagbantay sa sakyanan nga mogawas aron mangayog indirektang suhol sa ilang serbisyo nga wala kinahanglana

Nakahatag og dakong kahasol sa mga nanimbahay kining mga car-watch boys sa simbahan. Unta, mabadlong sila sa kaparian.