Sa kamot sa NBI

Anaa na karon sa National Bureau of Investigation NBI ang bola sa pakisusi sa kamatayon sa mayor sa lungsod sa Clarin Probinsya sa Misamis Occidental.

Mismo si Presidente Rodrigo Duterte ang mimando sa kapolisan nga ihunong na ang ilang gihimong imbistigasyon inay gimandoan ang NBI nga mao nay mosusi sa krimen.

Kagahapong adlawa miumol dayon ang NBI og investigating team sa naasoy’ng kaso, dili lang kutob dinhi sa rehiyon kondili aduna usay gikan sa kaulohan ug sa Mindanao kay didto man naggikan si Mayor Navarro.

Tanang anggulo sa krimen ang ilang tan-awon lakip na kon si kinsa ang mga nagpasiugda niini.

Apil sa ilang imbistigahan ang mga pulis nga nakakuyog sa convoy dihang gibiyahe ang mayor padung unta sa piskalya aron pasakaan og kaso apan wala na kini makaabot sanglit gibanhigan naman sa hapit na sila moliko padung sa Cebu City Prosecutor’s Office.

Admitido ang NBI nga dakong hagit kanila ang pagkuha sa kamatuoran kay magsugod man sila sa sinugdanan apan masaligon sila nga maangkon kini.

Nakig alayon na sila sa SITG nga giumol sa PNP alang sa pagkuha sa mga nakalap nga kasayoran aron nagamit sa ilang imbistigasyon.

Samtang gihangop sa kapolisan ang desisyon sa presidente kay mao usab kuno kini ang angayan nga mahitabo aron malikayan ang pagduda sa mamahimong resulta sa ilang imbistigasyon.

Andam ang kapolisan sa pagsumiter sa ilang kaugalingon sa imbistigasyon aron masayran gyud ang tanan diin wala kuno silay gitagoan.

Wala usab kuno malain ang mga pulis nga nakasugod na sa ilang pakisusi nga gihukasan sila sa imbistigasyon.

Gani medyo nigaan kuno ang ilang gibati kay nakuhaan na og bug-at nga trabahoon ug makatutok na sila sa ilang laing  gimbuhaton.

Gibarugan man sa pangulo sa kapolisan sa dakbayan nga isolated ang kaso ug walay angayang kabalak-an.

Daghan ang mga pangutana nga alang sa uban klaro na ang tubag apan lisod dakpon kon unsa kini.

Hinaut nga sa pagsulod sa NBI sa eksina mahatagan og katin-awan ang tanan, seguro nagpahibi lang ang tubag nga pwedeng mabingwit nila apan kon unsaon mao na kini ang atong atangan!