Shabu makita, alahas dili

Mga kilay naiknat pagkadungog sa naglanoglanog nga dugoong balita nga miulbo gikan sa usa ka mall sa dalan A. S. Fortuna, Barangay Bakilid, Mandaue City.

Tiaw bay, sa sayong gabii niadtong Oktubre 19, diin daghan pang kustomer ang nag-shopping, walay kukahadlok ang gibanabanang 13 o 15 ka armadong tawo nga mitulis sa lima ka mahalong tindahan nga anaa mismo sa sulod.

Gimartilyo ug gipamuak sa mga tulisan ang estante nga gidisplihan sa mga mahalong alahas ug wala kaugpo ang mga guwardiya kay kuno maoy gibukbok sa mga tulisan ug ospital hinuoy napuntariyahan.

Mikabat sa P136M ang nasakiyo sa mga tulisan. P130M niini mao ang balor sa gidagan nga mga alahas ug P6M ang salapi nga nadagit.

Hinuon, nadakpan ang pipila sa mga suspetsado: lima ang buhi, upat ang gipusil-patay kay misukol kuno sa minggukod nga kapolisan, kinsa usa kanila maoy ilang lider ug upat ang nakaikyas, kinsa maoy naghupot-dala sa tanan nilang tinulis.

Kining nakutlong pamahayag, nakamugnag bagang aso sa kalibog nganong dili man ang grupo, diin nakauban ang lider mismo, maoy nangunay sa paghupot sa ilang tanang tinulis? Dili ba sagad sa lider sa mga dautan, segurista man? Mosugot kaha siya nga lain ang pakupton?

Ang imahe sa kapolisan dugay nang naguba human hugawhugawi sa mga kauban ra pong otoridad (hinuon di tanan). Samot na, nga niining bag-o nakasohan si kanhi PNP Chief Oscar Albayalde human makuykuyi sa Senate hearing ang iyang pagdupa sa 13 ka ninja cops, kinsa imbes sibakon na unta sa puwesto, igo ra niyang gipa-demote.

Kon unsa ang punoan, mao usab ang bunga. Kon daotan ang punoan, daotan pod ang mga bunga. Busa, dili mabasol ang katilingban kon sila magduda unsa katinuod ang istorya nga gipagawas-ladlad sa kapolisan?

Nakabantay man god sila, nga kon shabu ang madakpan sa kapolisan, haskang abundaha sa shabu ang ipresentar sa publiko. Apan mga nanulis ganig alahas ug kuwarta, pastilan, ingnon ka lang, ang lider uban sa iyang mga sakop, among napatay. Pero, ang mga alahas ug kuwarta nga ilang natulis, atua sa nakaikyas.

Mao nga lawyer student nangutana: “Ikaw, Boss Jav, motuo ka?” Ay, masayran ni, kon madakpan na ang nakaikyas.  Wait lang ta!