Sinugdanan sa kataposan sa mayor

Nianhi sa Sugbo si Mayor David Navarro diin gipahigayon ang seminar nila sa mga staff ug opisyal sa lokal nga kagamhanan sa lungsod sa Clarin, Misamis Occidental.

Dala na usab seguro sa pagsuroysuroy o gitawag nga educational tour diin ang dakbayan sa Sugbo ang napili nilang suroyon.

Apan human sa ilang seminar, nag-unwind seguro ang mayor kauban ang iyang mga bodyguards.

Tupad sa venue sa ilang seminar sa usa ka hotel sa uptown area mao ang usa ka massage spa.

Nangita og masahista ang mayor apan wala nay available nga babaye, dinhi nasuko kuno si mayor ug nakulatahan ang usa ka lalaking masahista.

Nakuhaan og CCTV footage ang pagpanagmal sa mayor sa massage therapist.

Apan gawas niini, gireklamo usab siya og babayeng masahista kinsa giinong gipahimo siya og malaw-ay nga buhat.

Kini ang sinugdanan sa iyang kataposan ni Mayor Navarro tungod kay gi aresto siya dihang pasakay na sa eroplano.

Gitanggong sa Abellana Police station alang sa pagpasaka og kaso, mihangyo unta og hospital arrest apan no special treatment ang kapolisan.

Pagkaugma gidala na siya sa piskalya alang sa inquest proceedings apan wala pa gani nakaliko sa karsada pasulod sa buhatan sa piskalya giatangan ang ilang convoy sa mga tawong nagsakay og puti nga van.

Gibunlot ang mayor sa mga suspek dayon pusil kanita sa ulo ug sa nagkadaiyang parte sa lawas.

Patay ang mayor ug duna usay nangaangol sa pagpamanhig sa M. Velez St. baranggay Guadalupe dakbayan sa sa Sugbo.

Pastilan hapit ra ba gyud mi mi-convoy sa sakyanan sa mga pulis ug sa mayor apan maayo nalang niuna mi sa prosecutor’s office.

Nadungog pa namo ang butobuto sa mga armas ug sa pag-abot namo sa dapit nahay-ad ang mayor, nakita usab namo ang mga nangaangol nga gisakay og ambulansya.

Dakong buhi nga mianhi sa Sugbo, pag uli usa na ka kargamento ang gidangatan ni Mayor Navarro.

Sa mabaw nga panglantaw ang rason sa kamatayon wala gyuy hinungdan kay nagpaugay lang sa iyang pikoy. Apan aduna pa seguroy mas lawom nga rason sa iyang kamatayon nga mao ang iyang pagkaapil sa listahan sa narco politics sa pangulo.

Gilambigit usab siya sa Alperes robbery group nga mitulis sa mga tenant sa usa ka mall sa Mandaue City.

Ang pangutana kinsa man ang nagbanhig kaniya? Seguro pareho ra ta og tubag.

Kong wala pa lang unta siya nagpabadlong dili gyud unta siya matiltikan nga naa sa Sugbo.