Naglaway sa ginansiya sa tubig
ARANGKADA - Leo Lastimosa (Banat) - October 23, 2019 - 12:00am

Sama sa liki sa tubo sa ilawom nga may mohunob nga basa sa yuta (tuohi, bisan sa kanihit sa suplay sa MCWD makit-an gihapon sa pipila ka kadalanan), sama sa dunot nga hangin nga bisan unsaon og buot mangalisbo sa kinatibuk-ang lawak, ug sama sa tinagoan nga bisan unsaon og salimbong mosiwil ang sayal sa pagpaka-aron-ingnon, inanay nang nituybo ang tinuorayng tuyo sa ahat, gipamugos ug gisiging-siging nga paglahugay sa liderato sa Metro Cebu Water District.

May munisipyo nang nikumpisal nga may pribadong kompaniya nga nitanyag pagbanos sa ilang water system.

* * *

Ang munisipyo nga usa sa labing agresibo nga nikondenar sa kapakyas sa MCWD sa pag-apud-apod og igong suplay sa tubig sa tibuok adlaw ug gabii bugti sa pagbutang og mga bomba ug pagsuyop sa groundwater sa ilang lungsod wa hinuon moila sa kompaniya nga giingong nitanyag pagtukod og P375 milyones nga water system.

Ang pahibawo sa munisipyo gihimo niadtong Huwebes, Oktubre 17, 2019. O tulo ka semana human nipasar og resolusyon ang ilang mga konsehal nga nagtugot sa mayor pagputol sa kauyonan uban sa MCWD nga naumol niadtong 1992.

* * *

Paspas pa sa kilat ang wa ilha nga pribadong kompaniya kay sud lang sa 22 ka adlaw nakasumiter dayon og pormal nga tanyag sa komplikadong transaksiyon:

• Joint Venture Agreement nga may pasiunang puhonan nga P318.75 milyones gikan sa pribadong kompaniya ug P56.25 milyones gikan sa munisipyo;

• Ang puhonan sa munisipyo taplan una sa pribadong kompaniya ug bayran lang unya sa dibidendo nga di molapas sa 20% sa bahin sa ginansiya sa munisipyo; ug

• Ang kontrata molungtad og 35 ka tuig ug mahimong lugwayan.

* * *

Mas dakong kahigayonan nga ang sugyot (nga gikopya ra sa mga transaksiyon pagbanos sa water districts sa ubang bahin sa nasud) nadawat na sa munisipyo sa wa pa motulisok sa MCWD.

Ug, labaw sa kabalaka sa kanihit nga pila na ka dekadang wa masulbad, ang kamadanihon sa transaksiyon maoy nakapakalit og ulbo sa ilang kasuko sa MCWD.

Mahimong mao say nahitabo sa ubang LGUs nga hapit nagkadungan pagtunglo sa MCWD.

Posibleng mas madanihon pang tanyag sa tibuok Metro Cebu nga maoy nakapa-aliwaros sa bag-ong mga hawod sa paghimong kiko sa mga politiko.

* * *

leolastimosa@gmail.com

 

MCWD TUBIG
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with