Lintunganay
Fred P. Languido (Banat) - October 20, 2019 - 12:00am

Politika maoy dakong hinungdan nganong natudlo sa pwesto silang Joel Mari Yu, chairman sa Metropolitan Cebu Water District (MCWD), ug upat pa niya ka mga kauban sa board. Ang ilang ka suod ni kanhi mayor Tomas Osmeña maoy bug-at nga rason nganong sila nahimong director sa MCWD.

Tungod niini way nawong si Yu ug kaubanan nga mamasangil nga ang politika ug huyang nga panggobiyerno maoy nakaingon sa krisis sa supply sa tubig dinhi sa Metro Cebu.

Tingali husto siya nga nakatampo sa lapad nga problema ang politika apan nakalimot siya nga kabahin siya sa maong problema.

Nakalimot siya nga usa siya sa mga nakabenepisyo sa politika nga iyang gitumbok nga hinungdan sa krisis.

Ug isip kabahin sa hinungdan sa problema, tingali makatarunganon nga siya mokanaog sa katungdanan.

Kun duna siyay delicadeza, inay supakon ang kamanduan ni Mayor Edgardo Labella pagtangtang nila sa katungdanan, mas maayo og tumanon kini niya sa way kusmod.

Tinuod nagkinahanglan og due process ang pagtangtang nila sa pwesto, apan sa sitwasyon karon nga labihan ka lapad ang reklamo, kun duna pa silay uwaw nga nahibilin mas maayong mamutos sila ug dawaton ang kamanduan. Dili mahimong isalindot ang walo ka mga local government units nga mipalabang og resolution nagkondinar sa kapakyas sa MCWD pagtubag sa dakong kakuwangan sa ilang serbisyo.

Ug isip mga sakop sa board di kapanghunaw si Yu ug kaubanan sa ilang responsibilidad ug ipasangil sa nanlabay nga mga opisyal ang obligasyon.

Sila maoy anaa sa pwesto busa ilang responsibilidad ug tulobagon ang problema.

Ug tungod kay tataw nga diskontento ang publiko sa ilang serbisyo, angay ug makatarunganon lang nga sila tangtangon sa katungdanan.

Ang pag-alburoto sa diskontento nga mga konsumidor igo na nga sukaranan aron hulipan ang mga sakop sa MCWD board.

Ang pagpatuman sa kamanduan pagtangtang nila sa pwesto usa  ka paagi pagmatuod nga way sukaranan ang pasangil ni Yu nga ang huyang nga liderato sa gobyerno maoy usa sa nakaingon sa krisis.

POLITIKA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with