EDITORYAL - Kumusta na ang Marawi?

Kagahapong adlawa ang ikaduhang sumad sa gitawag nga “Liberation of Marawi” nga gideklarar ni Pres. Duterte human sa unom ka buwang giyera diha sa mismong siyudad aron puhagon ang teroristang Islamic State of Iraq and Syria (ISIS).

Apan ang maong kadaogan daw nahimong kaparotan sab sa mga yanong mga residente sa maong siyudad kay naguba man ang ilang dakbayan ug daghan sa mga molupyo ang namakwit ug wala pa gyud makabalik didto.

Suliran kini nga giatubang sa mga tawo didto hangtud karon. Bisan pa man og wala na ang giyera makita pa gihapon sa palibot ang kabangis sa maong gubat nga kinahanglang piyongan sa gobiyerno aron dili mosanay.

Husto si Duterte sa iyang gipamahayag sa iyang ikatulo nga state of the nation address ning tuiga, wala pa gyud hingpit nabuntog ang hulga sa terorismo.

Ang gobiyerno pinaagi sa Philippines Humanitarian Country Team sa ilang 2019 Marawi Humanitarian Response, Early Recovery and Resources Overview mibanabana nga 230,250 ka tawo ang nakabalik sa 72 barangay.

Apan hangtud karon, awaaw pa gihapon tan-awon ang maong siyudad kay wa kaayoy mga tawong nagtikawtikaw.

Giingong duna pay kapin dos mil ka pamilya ang nagpasilong pa gihapon karon sa 21 ka mga evacuation centers ug daghan sab ang nakipuyo sa ilang mga paryente, ang uban dia na sa kabisay-an sama sa Sugbo.

Maayo tingaling paspasan pa gyud sa gobiyerno ang ilang lihok para sa Marawi apan daw nagkamang ang paglihok niini.

Ang kahasol ug kalisdanan nga nasinati sa mga tawo didto lisud tugkaron mao nga dili kini maayong padugayon pa gumikan kay ang terorismo naa kanunay sa ilang ganghaan ug bisan unsang orasa mahimo nilang gamiton ang sitwasyon ug kasagmuyo sa mga tawo aron makangatake na usab.

Ang nahitabo sa Marawi makonsiderar nga kalamidad nga binuhatan sa tawo, apan sama sa katalagman gikan sa kinaiyahan nagbilin kini og kasakit ug pagantos sa mga tawo, ang gobiyerno lamang maoy makatabang kanila apan mag-agad sa gipaspason sa aksyon niini.