Kinsay magda og buot sa ASF
ARANGKADA - Leo Lastimosa (Banat) - October 18, 2019 - 12:00am

Ang tuyo unta sa  Philippine Association of Meat Processors Inc. (PAMPI) mao ang pagdangop ni Presidente Rodrigo Duterte aron nga maoy mangunay sa pag-awhag sa mga mayor ug gobernador sa Kabisay-an ug Mindanao sa paglibkas sa ban sa tanang produkto sa baboy gikan sa Luzon.

Apan bisan sa ilang pagpalaban nilang Agriculture Secretary William Dar ug Trade Secretary Ramon Lopez, wa sila hatagi og higayon nga makigsulti sa presidente. Maayo na lang nga nisimpatiya si Interior Secretary Eduardo Año sa ilang pangangkon nga maalkanse og P60 bilyones tungod sa ban.

* * *

Sukwahi sa ilang gipaabot nga epekto kun ang presidente pa lang unta ang nidason sa pasalig nga luwas pa sa African Swine Fever (ASF) ang higanteng mga pabrika sa delata ug ubang produkto sa baboy sa Metro Manila ug Luzon, gisupak sa lokal nga mga opisyal si Año.

Ambot tungod ba kay, lahi sa nangagi niyang mga sugo, wa manghulga og kaso si Año.

O nahinayak nang mga mayor ug gobernador sa pagduda sa kamatinud-anon sa mga pasalig ni Dar nga napugngan sa pipila lang ka dapit sa Luzon ang ASF.

* * *

Kun si Año pa lang untay gitugyanan sa presidente pagkontrolar sa ASF sukad sa unang pagtumaw sa gidudahang mga kaso niadtong Hulyo, mas makasalig untang katawhan tungod sa lapad niyang kasinatian pagtuman sa mas lisod nga mga tahas sa una.

Ambot unsay problema ni Dar, tungod ba kaha sa iyang pagka eksperto sa hardin nga mahimo rang magtutok sa kabuwakan sa way pagtagad sa mga takna, gitagoan niya ang unang mga kaso sa ASF sud sa dul-an usa ka buwan sa wa pa tug-ani ang gabinete ug ang katawhan.

* * *

Hinaot nga human sa duha niya ka aksidente sa motorsiklo makahigayon ang presidente sa pagpasiplat sa hulga sa ASF:

• Hingpit ba gihapon niyang saligan si Dar sa pagduma sa hiningusgang kampanya batok sa ASF bisan sa kuwestiyonable niyang mga lakang nga maoy hinungdan nga wa na tuohi sa lokal nga mga opisyal?; ug

• Kun hingpit ang iyang pagsalig sa mga sakop sa gabinete, mosugot ba siya nga isnabon lang sa mga mayor ug gobernador ang lehitimo nga mga sugo nilang Dar ug Ano?

* * *

leolastimosa@gmail.com

ASF
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with