Kontra ni Labella ang mga illegal

Samtang nanglimpyo ko sa akong lamesa karong buntag, nakit-an nako ang akong ‘notes’ sa State Of the City Address (SOCA) ni Mayor Edgardo Labella atol sa inaugural session sa Cebu City Council.

Diha pa nako mahibaw-i nga kining pipila sa iyang gipanghimo karon, nasubay gyud sa iyang SOCA. Usa niini mao ang isyu nga ang mga pedestrians maglisud na pag-agi sa mga aseras, mao nga gituman ni Labella ang mando ni Presidente Duterte paglimpyo sa mga aseras.

Pero ang naka-catch-up gyud sa akong pagtagad ang gisaad niya nga ang iyang administrasyon dili gayud motugot og mga binuang, kun illegal activities. Usa kuno siya ka abogado mao nga tumanon niya ang tanang lagda sa balaod.

Kanindot kaha no kon matuman ni Mayor Labella ang iyang mga gisaad ngadto sa katawhan.

* * *

 Ang mga nagpatrolya nga traffic enforcers ug mga traffic police nakasakop og “crane truck” nga gipadagan didto sa South Coastal Road sa SRP kaniadtong Domingo sa kaadlawon.

Gisita sa mga tinugyanan sa balaod ang operator/driver sa crane truck kay wala man kini tuguti nga makadagan sa mga karsada kay wala man kini rehistro sa LTO. Kining “crane truck” gamiton ra gyud ni sa mga construction site, ug kon ibalhin ni sa laing lugar, ikarga kini og trailer nga rehistrado sa LTO. Mao kini ang rason nga gi-impound sa CITOM ang crane truck ug giisyohan og “impounding receipt” ang operator.

Si LTO-7 Regional Director Vic Caindec mipasabot nga kon ang usa ka sakyanan giisyuhan na og impounding receipt sa LTO, dili gayud unta kini i-release hangtod nga may pagtugot sa LTO ug nabayran na ang multa. 

Apan base sa akong nahibaw-an, ang crane truck na-release man Domingo sa udto. Diin man mobayad og multa ang tag-iya sa crane truck nga wala may opisina ang LTO? Ang executive director sa CITOM nga si Ricardo Barandog miangkon nga may pagtugot kaniya nga ma-release ang crane truck bisan og wala tumana ang lagda kay may opisyal kuno sa City Hall nga nanawag niya ug mimando nga ipa-release lang ang ilang gi-impound.

Ambot kinsa kaha kini nga opisyal ang nanawag kang Barandog kay dili man gyud siya motug-an. Unya ra kuno niya itug-an kon ipatawag na siya ni Cebu City Legal Officer Rey Gealon nga maoy gitahasan ni Labella sa pag-imbestigar sa isyu.

Ka-thrilling niini uy. Basta, mo-resign kuno si Ricardo Barandog isip executive director sa CITOM kay nauwaw kaayo nga gipasanginlan nga nangilkil.

* * *

 Pagsuwat nako niini, bag-o pa gyud, nanawag nako si Mayor Labella ug nagpakisayod kabahin sa isyu. Lagot kaayo ang mayor ug misaad nga ipaimbistigar niya pag-ayo kining isyuha. Ang tinuod, dunay ebidensya nga ang usa ka trucker dinhi sa Sugbo nga maoy mitanyag nga mohatag sila og suborno kang Major Chuck Barandog nga nitabang pagsuperbisar sa CITOM nga gidumala sa iyang maguwang.

Gibalibaran ni Major Barandog ang tanyag, ug hinuon gipaspasan pa ang paghimo og operation kay  nainsulto siya sa gihimo sa maong trucker nga nagtoo nga madala ra siya’g suborno.