EDITORYAL - Bag-ong board, bag-ong ideya

Ug gipakanaog na gyud ang hukom ni Cebu City Mayor Edgardo Labella, lima ka mga sakop sa Metro Cebu nga gikan sa Metro Cebu Water District (MCWD) Board ang gipangtaktak niini sa pwesto.

Si Labella daan ng mipadayag nga buot niining pailisan ang lima ka mga sakop sa board sa MCWD tungo sa mga nagkadaiyang mga reklamo nga nadawat tungod sa kahaguka sa serbisyo sa maong ahensya.

Gani ang Hunta Probinsyal sa Lalawigan sa Sugbo; mga Sanggunian sa Mandaue; Lapu-Lapu; Consolacion; Liloan; ug Cordova mipagawas og resolusyon nga nanawagan ug nipadayag sa ilang pagkadismaya sa serbisyo sa MCWD.

Pipila aning mga lugara adunay mga atabay ang MCWD, apan sila mismo mireklamong wala maserbisyohi og tarong.  Kagahapong adlawa opisyal nga gitaktak sila si kanhi mga Konsehal Procopio Fernandez; Augustus Pe Jr.; Board Secretary Atty. Cecilia Jugao-Adlawan; Atty. Ralph Sevilla, Vice Chairman sa board ug ang Chairman of the Board nga si Joel Mari S. Yu. Gigamit gyud karon ni Labella ang gihatag kaniyang gahom ubos sa Presidential Decree 198 nga isip mayor sa Cebu City mahimo siyang motaktak ug mopili kinsa palingkurong sakop sa MCWD Board.

Maayo tingali nga ning higayona, may taga probinsya nang makalingkod kay pagkatinuod, dili naman Cebu City lang ang giserbisyohan sa MCWD karon. Husto hinuon nga pasalamatan ang lima sa serbisyong nahatag apan tingali panahon na gyud nga sila ilisan tungod kay pila na ka tuig silang naglingkod sa maong pwesto apan wala molambo ang serbisyo sa MCWD. Ang bugtong milambo lang mao ang pagpalapad sa ilang nabutangan og mga tubo sa tubig, apan gumikan sab niini naapektahan ang mga karaan na nilang kustomer. Dili gyud ikahibulong nga maapektahan ang agas sa mga karaang linya tungo kay i-rasyon nalang man ang pagpaagas kay nihit ang supply apan midako ang kinahanglang serbisyohan sa maong ahensya.

Ang pagsagol na sa tubig parat sa tinubdan sa tubig sa mga atabay sa MCWD ug ang pagkaupaw na sa kabukiran ang hinungdan. Gikinahanglan karon ang bag-ong mga ideya ug solusyon ug tingali naay motumaw ini og lingkod na unya sa mga bag-ong miyembro sa board.