Hagbong sa balidasyon

Makapaabot kita og dakong silot nga ipahamtang niadtong mga mayor sa mga local government units sa nasud nga mitiurok atol sa evaluation sa ilang compliance sa direktiba paglimpyo sa mga karsada ug sidewalk.

Dinhi sa lalawigan sa Sugbo, pito ka LGU ang nahagba sa ebalwasyon sa Department of Interior and Local Government. Kini mao ang siyudad sa Carcar ug mga lungsod sa Badian, Carmen, Compostela, Ginatilan, Moalboan ug Pinamungajan.

Kining maong mga LGU sa Sugbo lakip sa 97 ka siyudad ug lungsod tibuok nasud nga nahagbong sa ebalwasyon sa DILG. Sa Central Visayas, upat ka lungsod sa probinsiya sa Bohol ug usa sa lalawigan sa Siquijor ang wala mapasar sa maong balidasyon.

Gani, sa probinsiya sa Sugbo, bugtong dakbayan sa Naga lamang ang pasado sa maong road clearing order. Ang dakbayan sa Sugbo nga giingong adunay taas nga rating sa inspeksiyon ang “medium-compliant” ra diay basi sa resulta.

Matud sa DILG, posible nga mag-atubang og mga kasong administratiba ang mga mayor niining maong LGUs nga nahagbong sa ilang compliance sa road clearing directive ni Presidente Rodrigo Duterte. Ug nagtangag kini og suspensiyon.

Hinuon wala pa gipagawas sa ahensiya ang resulta sa maong inspeksiyon aron usab mahibaw-an ang basihan niini sa balidasyon. Ug mao kini ang gipaabot sa mga LGUs aron pagsuta kon asa nga aspeto sila nahagbong.

Angay lamang usab nga iplastar sa DILG ang resulta sa balidasyon aron pagpakita nga wala kini trampas. Kini aron usab nga dili magduda kadtong mga LGUs nga nahagbong sa ilang pagsunod sa direktiba sa DILG ug presidente.

Hinuon, sa laing bahin, angay lamang usab nga mahadlok ang mga LGUs nga nahagbong sa maong inspeksiyon. Kay basin kon magpusotpusot ang mga silot nga ipahamtang unya ngadto kanila gumikan sa ilang wala pagpakabana sa maong direktiba.