Paugat pa more!

Walay plano nga moluwat sa iyang katungdanan ang hepe sa Philippine National Police nga si Police General Oscar Albayalde bisan pa man sa kontrobersya nga naglambigit kaniya sa mga “ninja cops.” Apil ba kaha sa training sa Police Academy ang pabaga-ay sa nawong, mao nga bisan pa man kon naduhig na ang pangalan sa kaulawan, dili na gayod madutlan ang bisan kinsa nga hingtungdan? “PA-UGAT” na ba diay ang kahulogan sa mga pulong nga “Officer and Gentleman” sa kahugpungan sa PNP? Jaga-jaga!

Gilaming na man unta

Dakpon na karon sa LTO ang mga sakyanan nga mopakarga og mga pasahero sa luyo nga bahin nga gitagana lang unta sa mga kargamento.  Nalakip niining maong matang sa sakyanan ang mga multi-cab, pick-up ug mga de karga. Pastilan ang LTO, bahala na’g dili praktikal ug daw kataw-anan, ipatuman gayod kay kuno balaod man.  Sulod sa dugay’ng panahon, gilaming ra man unta ang maong balaodnon . Buot ba ang LTO nga magtagsa og sakyanan ang katawhan? Na hala, mangutang na ta’g sakyanan labon barato ra ang downpayment!

Di pa mapulihan, di pud mo-resign

Mipagawas og Orden Ehekutibo si Mayor Edgar Labella nga nag-umol og usa ka Water Advisory Committee kansang katuyoan mao ang paghimo og mga pagtuon ug pagtigom og mga impormasyon sa mga tinubdan sa tubig, nunot ni’ng suliran sa ka-nihit sa supply sa tubig sa Metro Cebu.  Tungod ba kaha kay dili pa man mapulihan gilayon ang mga sakop sa MCWD Board, unya wala man usab sila’y laraw nga mo-resign mao nga magtudlo lang una og Water Advisory Committee ang Mayor? Nangutana lang!

Bugti-an ug uling?

Mga residente sa tulo ka barangay sa Toledo City mireklamo sa baho nga nagagikan sa planta sa kuryente nga migamit og ‘coal’ kon uling isip sugnod niini.  Aduna’y susamang panghitabo kanhi didto sa lungsod sa San Fernando, Cebu diin ang tag-iya sa usa ka piggery nanghatag og baktin sa katawhan aron dili na moreklamo sa kabaho. Modawat ba kaha og sinako’ng uling ang mga residente sa Toledo City isip bugti sa ilang kahasol? Abangan ang solusyon!

Kape ug pan lang, daug na

Mipagawas ug pamahayag ang Philippine Association of Meat Importers, Inc. (PAMPI) nga adunay posibilidad nga magnihit ang mga hamon ug uban produktong karne nga kinahanglanon atol unya sa pagsaulog sa nagsingabot nga Pasko tungod sa gikahadlukan nga African Swine Fever.  Way kuwidawo kining maong balita alang sa mga kabus.  Basta di lang mawala sa tindahan ang pan de sal ug kape, Merry ra gihapon ang Pasko!