EDITORYAL - Ninja cops sa drug war

Nakwestyon karon ang integridad sa drug war sa gobiyerno nunot sa kontrobersiya sa “ninja cops” nga bag-ohay lang nautingkay didto sa kaulohan, tungod kay mismo ang pinakataas nga opisyal sa Philippine National Police nga si PNP Director General Oscar Albayalde ang gipasanginlang nagdupa aning mga polisa kaniadto.

Naukay kini atol sa gihimong Senate inquiry kabahin sa lain sab kontrobersiyal nga Good Conduct Time Allowance Law diin daghang inmates sa New Bilibid Prisons nga dunay mga bangis nga kaso ang nakagawas tungod sa maong balaod.

Ang mga “ninja cops” mao kadtong mga polis nga giingong mo-recycle og mga ebidensyang illegal nga drugas aron ibaligya pag-usab o gamiton personal.

Bisan pa man sa pangangkon sa mga kadagkoan sa gobiyerno nga way epekto sa kredibilidad ug integridad sa war on drugs ni Pres. Duterte ang kontrobersiya, dili kalikayan nga moisa ang kilay sa mga nagtan-aw.

Ilabi na nga daghan nang mga balita bahin sa mga polis nga mananom og ebidensya sa ilang mga dinakpan ug duna say mga polis nga tiggamitan og illegal nga drugas ug drug protectors.

Si Albayalde maoy nipadayon sa gisugdang Oplan Tokhang sa panahon ni kanhi PNP Director General ug karon Senador na nga si Ronald “Bato” dela Rosa.

Gipasanginlan siya sa usa sab ka kanhi opisyal sa PNP nga kini nasayod bahin sa mga hiwing polis nga wala gyud pangtaktaka.  Kini maoy hinungdan nga nanggawas ang mga panawagan batok kaniya aron mokanaog sa pwesto.

Si Albayalde gikatakdang opisyal nga moretiro sa serbisyo karong bulan sa Nobiyembre apan gumikan sa maong kontrobersiya hayan masayu-sayo ang iyang pagretiro. Mismo si Duterte namahayag nga gusto niyang dunay himuong imbestigasyon bahin sa “ninja cops.”

Wala sab hinuon moingon ang pangulo sa pagkakaron kun nawad-an na siya og salig kang Albayalde, tingali gisabaan lang kini sa kasikas nga gikalambigitan sa iyang gipiling mangulo sa PNP.

Apan husto nga kinahanglang matangtang ug masilotan ang mga polis nga mo-recycle sa mga ebidensyang illegal nga drugas.