Tinagoan

Nag-ung-ong karon sa Ubos Balay Balauranan ang balaudnon nga gisang-at ni Rizal Province Second District Representative Fidel Nograles nga nagpalapad sa sakop sa Akta Republika 9262 o ang Violence Against Women and their Children Act.

Ang House Bill No. 4888 nga gipalabang ni Kongresista Fidel Nograles gusto nga i-apil sa balaud ang mga abuso nga gihimo batok sa kaparehong pares ug bana nga anaa sa gitawag nga heterosexual nga relasyon.

Ubos niining maong balaudnon, ang terminong “partner” langkoban kini dili lang sa heterosexual nga relasyon kun dili I-apil usab niini ang lesbian, gay, bisexual, queer, intersex, cisgender ug transgender partners.

Kun ugaling makalusot sa Kongreso ang HB No. 4888 mahimo nang kalapasan ang mosunod nga binuhatan batok sa partners ug mga anak: Una, physical violence; ikaduha, Sexual violence lakip na ang lugos, sexual harassment, pagpugos sa pagpatan-aw sa mga malaw-ay nga talan-awon ug basahunon, pagpugos sa paghimo og mga malaw-ay nga butang ug pagprostitute sa ilang mga partner ug anak; ikatulo, Psychological violence o buhat nga makamugna og kasakit sa huna-huna ug pagbati; ug ang ika-upat, economic abuse o buhat nga misuway sa paghimo sa ilang mga partner nga magsalig na lamang kanila.

Sa pagkakaron ang Akta Republika 9262 nagsilot sa physical, sexual, psychological ug economic abuse nga nahimo batok sa kababayen ug ilang anak.

Ubos sa HB 4888 economic abuse na ang pagkontrolar sa asawa o partner sa kita o propiyedad ug sa conjugal o kita ug propiyedad nga gipanag-iya nilang duha sa iyang bana o partner. Buot ipasabot, gidili na sa balaudnon ni Nograles ang pagkonpiskar sa kita o suweldo sa iyang asawa o bana o partner.

Kining maong balaudnon nagkonpirmar (bisan dili direkta) nga daghan gayod nga bana o partner ang giabuso usab sa ilang mga asawa o gikauban sa kinabuhi.