Angay na bang mamutos si Albayalde?

Dili na ikatingala pa ang mga taho sa giingong mga badlongong pulis nga nagtago ug nag-recycled sa mga ilegal nga druga nga ilang nakonpiska gikan sa mga bigtime drug personalities nga ilang nasikop o napatay atol sa mga operasyon.

Apan walay termino kining maong mga klase sa polis kniadto. Basta mga bugok lamang sila sa han-ay sa Philippine National Police nga gibansagan na karon og mga “ninja cops o policemen” kinsa miburot sa ka dato gumikan sa mao nga binuhatan.

Apan ang labing nakapakurat niining maong kontrobersiya mao ang seryosong akusasyon nga mismo ang labing dakong opisyal sa kapolisan sa nasud ang gilambigit nga aduna kunoy koneksiyon sa mga “ninja cops”

Ambot unsa ka tinuod ang akusasyon nga protektor kuno si PNP chief General Oscar Albayalde sa mga “ninja policemen” sa dihang hepe pa kini kaniadto sa kapolisan Pampanga. Kini basi usab sa alegasyon ni kanhi police general ug karon Baguio City Mayor Benjamin Magaling.

Karon nabulit na sa dakong lapok ang lingkoranan sa hepe sa kapolisan sa nasud, ang labing dako nga kontrobersiya nga mitay-og sa opisina niini.

Tungod sa ka seryoso sa maong alegasyon, daghan ang nag-alburoto ug nanawagan sa resignasyon ni Albayalde.

Apan lig-on ang baroganan ni Albayalde nga magpabilin sa iyang puwesto. Matud niya nga magpaabot lamang siya sa desisyon ni Presidente Rodrigo Duterte ug sa Department of Interior and Local Government. Si Albayalde gikatakda nga moretiro sa sunod nga bulan.

Hinuon, kon adunay nahabiling respito si Albayalde sa iyang posisyon, angay lamang nga mamutos na siya ug mokanaug sa iyang puwesto. Kini aron pagsalbar sa ka sagrado sa opisina nga iyang gihuptan.

Apan sa laing bahin, makasabot usab kita sa baroganan ni Albayalde nga magpabilin sa pwesto. Siguro iyang gamiton ang nababilin niyang mga adlaw sa posisyon sa pagpamatuod nga inosente siya sa mga akusasyon nga gihapak ngadto kaniya.