Ang mga bata

Di pa lang dugay gihimo ang pagbendisyon sa mga tunghaan sa Madridejos Elementary ug High School dinhi sa Alegria. Human sa maong pagbendisyon nahimo ang pagbalik lantaw sa kagahapon.

Apil na niini ang mga kalantahon sa dayon nang pagpamuhi sa mga tunghaan kaniadto.

Nahinumdom nuon ko nga giawit namo kaniadto kining mosunod: “Paalam, paalam na po si nanay si tatay naghintay sa bahay kami ay uuwi sa aming bahay tapos na ang klase maligayang buhay!”

Dayon maglumbaay kami og panggawas sa classroom uban ang dakong kalipay kay gawas nga makakaon na kami sa bawon nga pinutos saging ignon man ang kinasingkasing pahiyom. Nahinumdom ko sa akong classmate nga si Jeffrey Albofera ambot asa na kaha siya karon nga mohatag gyud tawon sa akong bawon kay lagi sud-an nako kaniadto mao usab ang kan-on.

Wa pa gani mauso ang mineral water kaniadto ang among imnon tubig ra gyud sa gripo.

Human sa klase di dayon mi mopauli sa balay kaniadto kay magpunay pa mi og duwa hangtud na sa hapon. Ang akong trabaho kaniadto mao nga mouli ko sa amoang payag ginuyod ang mga kanding nga akong gitugway nianang pagkabuntag.

Sa laktod, simple ra gyud tawon ang kinabuhi kaniadto. Butang nga akong gikamingawan pag-ayo. Kun pwede pa lang ibalik kaniadto kamaayo man gyud unta apan wala kitay time machine ug ambot tinuod ba sab kaha ang time machine nga nahimong bunga lamang sa duhiraw sa hunahunang latagaw.

Teacher’s Day di pa lang dugay ug dinhi sa amoa sa parokya ni San Jose sa Sangi, Alegria among gisaulog ang Teacher’s Day human sa misa simple nga programa anaa gyud nang lamesa.

Apan subo lang palandungon nga human sa hudyaka ang mga maestra nagganayan sa kapilya aron duawon ang patay nga bata nila gumikan sa dengue nga sakit.

Anugon kay si kevin Grade Two pa intawon ug unta tingali daghan pa siya og maabot kun nahatagan pa lang og kahigayonan nga mabuhi.

Apan ang dengue maoy nisakmit sa iyang kinabuhi.masakitan gyud ta labina kun mga bata ang mahiagom sa kalibutanong kapintas.

Sa akong pagbalik sa akong lawak sa kumbento akong gisuway og scan ang mga hulagway diin ako nakighagwa hagwa sa mga bata. Ang among mga kiningkoy nga mga nawong, ang among mga duwa duwa nakapangisi nako sa hilabihan, nawala ang akong kakapoy ug gibati ko ang kalipay bisan kun layo ang Inghoy. Ang simple nga kinabuhi di kabayran og sapi ug ang yanong mga tawo dili angayang talikdan.