Baho sa PNP nanimaho

Akong anhing Tatay Andot, niadtong hayskol pa ko, magsigeg ingon: “Nindot ang mag-PMA-yer, Dong. Kay inig kalampos, mahimo dayon kang opisyal sa mga sundalo. Unya, gawas nga dakog kita, ang gobiyerno mao pay mohatag nimog guwapang asawa.”

Pero di bastabasta sudlon ang PMA. May mga rekisitos kini nga istriktong gipasunod. Busa, sa height requirement pa lang, tagak na ko.

Tinuod ang gisulti ni Tatay nga madato gyod ang graduwado sa PMA. Labi nag ma-promote pagka heneral? Ay, pastilan, walag tuo ang kuwarta. Sagad sa mga heneral, may mga dagkong balay, kayutaan ug bag-ong mahalong sakyanan.

Usa ray heneral nga nailhan nakong wala maadunahan. Ang papa sa kanhi kauban namong card dealer.

Karaan intawon ang balay nga ilang gipuy-an ug kagangkagang pa gyod ang kotse nga adlaw-adlaw nilang sakyan. Unsaon, sobra ka honest sa trabaho iyang amahan.

Dihay higayon nga giduol og higanteng magpapatigayon ang heneral ug gitanyagag minilyong salapi bugti sa paghatag og proteksiyon sa ipalusot nga dinagkong illegal nga negosyo. Ay, gi-turned down, uy!” Sumala pa sa asoy sa card dealer.

Wala gyod mahilambigit sa mga kontrobersiya iyang Papa. Dili pareha ni Gen. Albayalde nga sa milabay’ng Oktubre 1, Martes, dihang gipahigayon ang joint Senate committee investigation, mibuto ang usa ka makabungog nga isyu human giyagyag sa kanhi usa ka PNP general ug karon mayor na sa Baguio City, Benjamin Magalong nga may dako kunong papel si PNP Chief Oscar Albayalde niadtong 13 ka polis sa Pampanga.

Kadtong mga polis nahilambigit sa illegal drugs recycling tapos sa ilang malamposong November 2013 raid didto sa lungsod sa Mexico, diin human hukmi nga taktakonon na sa trabaho ug posible pang mabilanggo sa tibuok kinabuhi, igo lang gi-demote.

Aw, of course, wa gyod kini angkona ni Albayalde, kinsa moretiro na ning umaabot Nobiyembre 7.  Hugot niyang gidepensaan nga dili magkahugaw ang kalinis sa daghang medalya nga nagbitay sa iyang dughan.

Dulot sa bukog ang iyang paglikay sa maong pasangil.

Apan bisag unsaon pa pagpaningkamot ni Albayalde pagpapha ning hugaw nga gisaliyab ngadto niya, ang baho sa PNP nga hagbay rang nanimaho, di na matakpan. Moalisngaw gayod.

Matang sa alisngaw nga magmatuod nganong dili gyod mapuo ang negosyong shabu.