Naay trabaho apan wa’y buhat

Pipila ka mga kawani sa Lapu-Lapu City Hall nga gibalhin pagdestino sa mini City Hall sa Olango Island mireklamo kay wala kuno sila’y mabuhat sa ilang bag-ong buhatan. Dayag nga politika ang hinungdan sa pag-reassign sa maong mga kawani apan dili unta kini himoong rason o babag sa pagbuhat sa mga bulohaton nga angayan buhaton sa usa ka kawani sa lungsod.  Matud pa sa panultihon, “Ang labing maayong paagi nga dili ka mawad-an sa paglaum mao ang pagbarog aron mobuhat sa mga bulohaton”. Reklamo pa more!!!

Faulty electrical wiring

Miumol karon ang Bureau of Fire Protection og usa ka ‘Investigating Team’ nga mosusi sa hinungdan sa nahitabong sunog sa Star City didto sa kaulohan.  Sama sa naandan, human unya sa “makuti ug hataas” nga imbestigasyon, mogawas gihapon nga ang hinungdan sa maong sunog mao na usab ang “Faulty Electrical Wiring” nga maoy sinugdanan sa dakong pagsilaob.  Matud pa sa  akong silingan nga tigulang, “Kanunay nila’ng ipasangil nga ang hinungdan sa sunog mao si “Faulty Electrical Wiring”, apan hangtud karon wala gihapon siya dakpa sa mga tinugyanan sa balaod. Mao diay nga way kasulbaran ang sunog”. Faeetz!!

Apil pud unta ang mamalitay

Mga vendors nga sakop sa CEMVEDCO supak sa laraw nga pagmoderno sa Carbon Public Market, ang naila nga labing karaan ug labing dako nga merkado sa Sugbo.  Ang maong pagsupak mitumaw human ang mga opisyal sa maong kahugpungan nakabaniog ug dili maayong kasinatian sa usa ka susamang merkado sa kaulohan.  Makapaabot kita ug panagtigi sa baruganan tali sa mga gidumala (vendors) ug tigdumala (City government). Dili ba kaha maayo nga mosalmot sa panagtigi ang mga konsumidor kay sila man unya ang tinoud nga labing apektado kon dili maresolbar gilayon ang isyu? Nangutana lang!

Dili patas kay dili angay

Mga magtutudlo sa kaulohan giingon nga pasakyon sa MRT3 nga libre ang pamasahe atol sa kasaulogan sa National Teachers Day. Mora’g adunay pagpihig ang maong kamanduan kay tataw man nga dili makapahimulos niining maong ‘pahalipay’ ang mga magtutudlo nga anaa sa probinsya. Daw nabati nako ang ubang magtutudlo nga naahat pagkanta sa awit nga nagkanayon: “Matud nila, KAMI DILI ANGAY”. Hala no!