Ang loading nga Internet

Usa sa mga di mahimong wad-on sa akong kinabuhi mao gyud ning internet ingon man ang laptop. Bahala na lang tingali og wa kaayo ang laing kalingawan basta naa lang gyud ning duha. Ang tuyo man gud nako mao nga pinaagi ning duha ako makatagik kun unsay nia sa akong hunahuna ug kun ugaling mohinay ang dagan nga sa ato pa loading kaayo ang tanan, daw kalbaryo alang nako ang maong kahimtang. Kini tungod kay ang akong adlaw gibahin naman gud nako sa nagkadaiyang mga buluhaton kay kun ma late ang usa automatic naman nga mapagan ang uban.

Mao nga malisud gyud usahay ang pagpaabot labina kun hinay ang dagan sa kinabuhi. Kapoy pud kaayo ang magpunay og katulog.

Kumon na nga kasinatian sa kadaghanan nato ang loading ug hinay nga internet. Daghan ang maglagot kay dili naman sila makasubay kun pila na ka buok ang ilang likes o may ni comment ba sa ilang mga posts sa facebook. Ang uban labina kun online business ang panginabuhian ang maglagot gyud sa hilabihan labina kun langay kay unsaon na lang ang ilang patigayon labina nga ning panahona karon daghan na kaayo ang kompetisyon. Mao nga saputon ang kadaghanan kanato kun kini mahitabo.

Apan ingon ini tingali usahay ang kinabuhi murag internet kay langay. Langay tungod kay daghang mga samokan ug moapil apil sa matag plano o laraw alang sa kalambuan. Langay tungod kay malisud alang nato ang paghangop sa paspas nga kabag-ohan. Langay tungod kay dunay mga hitabo nga lagbas sa atong gipaabot ug gilauman. Wala kitay laing mahimo gawas sa pagdawat nga kini mahitabo. Kay the more gud ka nga magdumili the more usab nga ikaw sungogon.

Dunay mga higayon nga ako saputon apan sulod sa akong lawak akong gihunahuna ang giingon ni Henri Nouwen: “In Solitude, we can find ourselves!” mao tingali nga gihimong langay ang internet aron sa ingon mamahimong makagahin og panahon sa kaugalingon. Mao usab kini ang giingon ni Papa Francisco: “Turn off your gadgets and talk to your children!” kay mag-unsa man tuod kun magkapundok apan way tingganay kay lagi na busy sa pagkubi kubi sa tagsa tagsa ka mga gadgets nila.

Kay bisan unsaon pa nako hinay gyud ang internet mao nga nitagpilaw na lang ko. Mas maayo pa ang akong damgo paspas pa kaayo apan lisud man pud kun magpabilin kita sa pagkatulog, kinahanglan kita mobangon aron makapadayon kita sa bisan unsa nga atong mahimo sa atong kinabuhi, magmabungahon  lang kini.