Dakong maldisyon ang mapaabot

Gilabhan karon ang Metropolitan Cebu Water District (MCWD) sa mga local government units (LGUs) ug ubang sektor sa Metro Cebu gumikan sa grabe nga kakulang sa suplay sa tubig nga nasinati karon sa franchise area niini.

Tuod man, grabe nga nakapanagang ang maong water utility firm sa wala ug tuo nga mga batikos gikan sa mga LGUs sulod sa Metro Cebu, nga gipangulohan sa konseho sa dakbayan sa Sugbo, nga nagtumbok sa dakong krisis sa tubig nga atong nasinati karon.

Gani, misakay usab pag-atake ang Hunta Probinsiyal ug ang Metro Cebu Development Coordinating Board (MCDCB) nga miklaro nga moabot sa 60,000 ka litro sa tubig ang nausik sa MCWD matag adlaw sulod sa franchise area niini.

Hinuon dili na usab nato ikatingala pa kining dakong problema sa kakulang sa suplay sa tubig gikan sa maong kompanya nga atong nasinati karon. Hagbay na kining maong suliran, ilabina matag ting-init.

Bisan niining panahon sa ting-ulan daghan sa mga lugar sa Metro Cebu ilalum sa maong utility firm ang nahubsan gayud sa tubig. Kini ilabina na gyud didto sa mga elevated areas nga dili na makasaka pa ang suplay sa tubig.

Ug dili usab nato mabasol ang katawhan ug ang ubang mga sektor nga mobasal sa maong water distributor. Kini gumikan kay hangtud karon, wala gayud masulbad kining maong problema nga atong nasinati sa subra na sa usa ka dekada.

Ang problema mao nga walay komprehensibo nga mga proyekto ang maong kompanya pagpalambo sa sa serbisyo niini, ilabina sa natad sa pagsaka sa suplay sa tubig nunot niining nagkadako nga populasyon ug grabe nga urbanisasyon sa Metro Cebu.

Kini ang hinungdan ngano nga misangko kita niining seryoso nga problema sa kanihit sa tubig karon. Kay kon magpadayon kini, mas dako pa nga maldisyon ang atong mapaabot sa umaabot nga mga adlaw.