Mogilak ang bulawan ug makit-an

Makalingaw kining gipanghimo sa mga bag-ong napiling mayor. Nahisama sila sa mga himsog marathoners nga iyahay og pakusog sa ilang pagpangalagad sa katawhan.

Si Mayor Edgar C. Labella miarangkada dayon. Nagplano paghimog mga proyekto nga makabulahan sa tanan.

Si Mandaue City Jonas Cortes, dihadiha, misikad usab. Gipadayon ang istriktong pag-implementar sa trapiko sa kadalanan ug naninguha nga maalim ang mga samad sa politika aron mahatagag maayong serbisyo ang tanang nanginahanglan.

Ang bag-ong haon nga si Lapu-Lapu City Mayor Junar “Ahong” Chan, bisag giharangharangan iyang dalan sa tawhanong gumonhap, wala magpabalda. Naningkamot pod siya nga makabulhot. Gilimpiyohan niya sa mga sagabal ang iyang balwarte.

Buwahan, dili siya masugsog sa iyang paglingkod. Ug sama sa naandang praktis sa ilang siyudad, gipadayon ang pagpanghatag og P100K-cash gift sa nag-100th year birthday nga centenarian.

Wala magpaulahi si Talisay City Mayor Gerald Anthony ‘Samsam V. Gullas Jr. kang kansang pagpangalagad nahisama sa kusog bul-og sa matin-awng sapa-paspas! 

Ug nagpadayon sa pagkilab nga hitandangan sa mausisahong mata sa katilingban.

Kon unsay gisaad ni Samsam ngadto sa publiko, kini iyang gituman. Gikan sa mga basurang naglaundok sa kadalanan ngadto sa mga sagbot nga nanglutaw sa kasapaan, kining tanan iyang gilimpiyohan ug gipalimpiyohan.

Mahal niya ang kinabuhi sa tawo. Busa gusto siyag kalimpiyo ug kahimsog.

Gidasig-awhag niya ang kamaestrahan ug kabataan sa mga eskuylahan pagpananom og mga utanon aron sa pagpanglabay sa mga adlaw, may maani nga lutoonong pagkaon gikan sa yuta nga makaayo sa panglawas ug makapahilayo sa mga GMO injected foods and vegetables nga mao nay sagad natong mapalit sa atong kamerkadohan karon.

Clearing of roads and sidewalks aron mabalik ang paggamit niini ngadto sa katawhan? Dinhi ko belib ni Samsam.

Kay istrikto gyod niya kining giimplementar. Dili lang niadtong unang adlaw nga gimando kini ni Pres. Duterte kondili hangtod karon nga mihatag nag deadline ang pangulo.

Hapsay na gyod ang kadalanan ug sidewalk sa Talisay City. Lakip na ang Tabunok market.

Gani, gidayeg si Samsam ni Department of Interior and Local Government Officer Liza Fernandez. Kay dihang paghimo niyag pre-validation, nakit-an kining exemplary performance sa kugihang mayor nga daw bulawan nga migilak sa panan-aw ni Fernandez.