Rabies batok kaisog

Niay asoy sa usa ka babayeng pasyente nga mipaambit sa iyang kasinatian bahin niadtong laing pasyenteng lalaki nga nakauban niyag lawak sa tambalanan, kinsa ngil-ad kuno kaayo tan-awon  sa higayon nga mosugmat ang mitakboyng sakit.

Kuyawan siya. Kay maglaway kuno taman sa ginhawa ang pasyente, magsigeg paghot ug nahisama gyod sa irong buang nga humahambat.

Kaluoy sagol kahadlok ang iyang bation samtang nagsud-ong sa nurse, kinsa monas ginhawang paningkamot nga mapakalma ang kahimtang sa pasyente.  Basin mapaakan ang nars ug matakdan.  Pero mipasalig ang makaluluoyng pasyente: “Ayawg kabalaka, Nurse.  Paninguhaon ko taman sa ginhawa nga dili tika mapahit.”

Ug igo na lang idumog ang nawong sa lalaki ngadto sa habol nga mitabon sa bukton niya kada higayon nga mohalhal-maglaway na iyang dila.

Matod pa sa dalaga, nga sobra kadako ang gigamit dagom nga direktang gituslok ngadto sa ulo sa pasyente, namasin nga mapugngan pa ang pagkatag sa rabies nga misaka na sa utok.

Dato ang nahisgotang pasyente. Isog sa ilang dapit. Mao man gani, nga dihang gipaak siya sa irong buang, siya mismo ang nangunay paggukod ug pagpatay niini. Sa tumang kalagot, giinom niya ang dugo ug gikaon ang tanang utok sa iro.

Ang iyang pamilya ug kahigalaan ang nahadlok sa iyang gibuhat.

Kay bisag giunsa nila pagpahimangno, wala gyod mopatuo ang bagsik nga dulot gyod sa bukog ang kasuko ngadto sa mananap nga mipahit niya.

Maoy mipasulabi sa iyang galamhan ang tumang kaisog sa pagpanimalos.

Wala abtig usa ka bulan, misugmat ang makalilisang sakit sa rabies sa tibuok kalawasan sa maong isog nga lalaki.  Iyang kahimtang, bayhon ug linihokan, parehas gyod sa irong buang. Mongulob, mopaghot ug mohanag bangon aron mamaak.

Gibuhat tanan  sa mga doktor nga maluwas ang adunahang pasyente. Apan wala abtig usa ka semana sa ospital, nakabsan ang gikaintapang maton sa iyang kinabuhi.

Midaog gyod ang rabies sa mananap batok sa kaisog sa tawo.  Tuig 2017 pa kuno kini nahitabo. Apan nagpabiling lab-as sa panumdoman sa tsikadorang batan-ong guwapa, kinsa mi-join nakog lingkod didto sa talad-kan-anan sa E-mall. Giingnan ko siya:

“Dinhi sa siyudad, daghan pong irong buang. Beware, ha? They also have rabies.”

Ug nagdungan ming duha sa pagpangatawa.