Suliran sa tubig

Gitabangan sa konseho sa dakbayan sa Sugbo ug sa Hunta Probinsiyal ang Metro Cebu Water District (MCWD) tungod sa dugay na nga reklamo sa mga konsumidor sa kakuwang sa supply sa tubig.

Ang Provincial Board mipalabang og resolution nagpadangat sa kasagmuyo ngadto sa water district. Samtang ang City Council pinaagi sa usa ka privilege speech ni Konsehal Raymond Garcia nanawagan gyud gani nga hulipan ang mga director sa MCWD board.

Duha ka punto ang nahimong dugokan sa reklamo: una ang dili maayong serbisyo sa water district ngadto sa mga konsumidor tungod sa kakuwang sa supply. Ug ang  ikaduha, ang tinguha niini pagpalit og usa ka gatos ka milyon ka litro sa desalinated nga tubig gikan sa consortium sa Aboitiz ug Metro Pacific. Si Mayor Edgardo Labella mipadala na og suwat ngadto sa MCWD board nga ihunong ang negotiation uban sa Aboitiz ug Metro Pacific tungod kay matud sa mga opisyal sa dakbayan momahal ang presyo sa tubig kun kini ihinayon.

Ang MCWD sa ilang tubag sa maong mga isyu nangayo og dispensa sa kakuwangan sa ilang supply. Apan tak-om sa isyu mahitungod sa posibling pagsaka sa presyo kun molampus ang negosasyon.

Inay tubagon ang kabalaka igo lang miingon ang MCWD nga wala pay nakab-ot nga hukom may labot niini. Tungod sa paglikay sa MCWD nga tubagon ang maong isyu, gihatagan niini og basihanan ang kahingawa sa mga opisyal sa dakbayan.

Posibling mosaka gyud ang presyo sa tubig kun mopalit ang MCWD og supply gikan sa Aboitiz ug Metro Pacific ug angayang daygan sa mga opisyal sa water district ang publiko maylabot sa maong posibilidad.

Apan sa pikas bahin, dili malalis ang pagkuwang sa supply sa tubig. Kun dili ihinayon sa MCWD ang negosasyon, unsa may alternatibo nga itanyag sa mga opisyal sa dakbayan pagsulbad sa problema?

Sigun sa MCWD nga sa miaging 45 ka adlaw moabot sa 20 mil cubic meter sa supply sa tubig ang nahanaw tungod sa salt water intrusion kun pagsulod sa tubig dagat sa atong mga tinubdan. Ang datus nagpakita nga ang Sugbo nagkinahanglan og 580 mil cubic meter nga supply sa tubig matag-adlaw apan ang actual nga supply sa MCWD anaa lang sa 233 mil metro kubiko.

Unsaon man pagsulbad sa MCWD ang maong kakuwangan? Dinalian ang panginahanglan tungod kay dugay na nga gaantos ang konsumidor. Kini maoy angayang timbang-timbangon sa atong mga opisyal.