Ang kasagaran niyang yawiton

Dunay tinun-an nga gipaadto kanako. Kini dunay dakong kalambigitan  sa iyang gihambing balatian. Sa among pagkukabildo nakita ko nga grabe ka lawom ang gihambing kasakitan sa dihang walay ni usa ka positibong affirmative word nga iyang nadungog gikan sa iyang amahan.

Matag karon ug unya padayon siyang gitandi ngadto sa iyang inahan ug sa maong pagtandi nahipatik sa iyang alimpatakan nga mamahimong sama sa iyang inahan ang iyang mga binuhatan.

Buot niyang moikyas gikan sa maong suliran mao nga naumol sa iyang imahinasyon ang nagkadaiyang sugilanon kalabot sa iyang kaugalingong kahimtang.

Sa ato pa buot niyang motagik og sugilanon kalabot sa iyang kaugalingon ingon nga babaye nga dunay mahimo sa kaugalingon, babaye nga in-control sa iyang kaugalingon ug in-control sa iyang palibot. Buot niyang i-project nga siya kadtong babaye nga sama ni Wonder Woman, lig-on ug way gikahadlokan. Sa laktod nga pagkasulti buot niyang magpabiling kusgan taliwala sa iyang kahuyang. Kini agig pag cope up sa negativity nga iyang nasinati.

Sa akong paghunahuna niini akong nakita usab ang akong kaugalingon sa mga higayon nga maglisud ko og bangon panahon sa mga pagsulay.

Buot nakong magpakabuhi panahon sa maong kahuyangan.

Apan ang maong pagsulay dunay paglurang kay human sa kalisdanan anaa man ang makabuhing pasalig nga ang tanan mahimong imong malampasan.

Ako lang gyud siyang gipaminaw ug human niya mabatbat ang tanan ako siyang giingnan nga mas mahinungdanon kaayo ang paghupot og positibong panglantaw sa kinabuhi.

Ang kamatuoran mao nga dili tanang tawo malipay nato bisan gani ang atong mga ginikanan mahimong mosalindot nato panahon sa dakong kalisdanan ug ang pinakabati pa gyud niini kita pa ang basulon sa maong kahimtang.

Nahinumdom nuon ko sa akong higala nga gisalikway kaniadto tungod sa iyang kahimtang. Daw walay modawat kaniya tungod sa iyang pagka siya apan ang iyang mga luha dinuyogan sa iyang pagkamapaubsanon maoy nagdala kaniya ngadto sa kahimayaan sa iyang mga pangandoy apan bisan pa niini padayon siyang nahimong mapaubsanon taliwala sa maayong kapalaran ug ang maong kamanggihatagon niya nahitabo kay siya maampoon man.

Ang tawo kinahanglang mobulig kun unsay naa. og kun unsay gidalit sa kahigayonan ug sa Dios. Mao nga imbes pagmahay ang angayang yawiton atong yawiton ang mga pulong sa pasalamat.