Misplaced lang ba?

Matag usa nato buot magdali ug makahuman sa buot natong tiwason nga buluhaton. Apan subo palandungon nga dunay mga higayon sa atong pagdali dali makasinati man nuon kita og tumang kalangay kini tungod kay ang atong giplano mahimong pakgangon sa mga hitabo nga dili nato tuyoon nga maoy hinungdan sa dugang pang langay.

Ingnon ka lang nga na misplaced ra tong butanga mao nga wala na gyud nimo igkita pa. O mahimo pud nga sa dihang misud ang laing tawo didto iya pud tong gisignit ug iyang gipasiatab nga wala na gyud to o na misplaced ba nuon aron siya dili na pangitaan ug kwestiyonon.

Usahay ingon ini pud baya ang atong kinabuhi. Daghan ta og plano alang sa atong kaugalingon ug sa atong kaugmaon.

Daghan kaayo ta og tumong ug tuyo aron mamahimong malampuson ang tanan natong paningkamot.

Apan talukahaw lamang mamahimong mas langay nuon kay dunay mga panghitabo nga mahitabo ug wa nimo damha nga mahitabo.

Apan sa laing bahin ang maong kalangay dunay mahatag nga kaayohan usab alang kanato.

Usa na niini mao man ang pagsuhid sa atong kahimtang ug sa atong disposisyon.

Nagmapailubon ba kita o nahimo ba kitang agresibo ra kaayo? Nahimo ba kitang naghunahuna nga ang tanan diay gikan sa Dios ug dili gikan ni bisan kinsang tawo? O basin kaha nahimong misplaced ang atong kaugalingon gikan sa bisan unsang tumong Diosnon kay atong kaugalingon lamang ang atong gibuhong.

Mao nga kun ikaw malangay ayaw kabalaka ni kaguol kay matag kalangay dunay rason. Sa dihang nisud ko sa classroom nako kaniadto sa tunghaan nga akong gitrabahoan wa ko damha nga nadugay ang maestro nga kanako nag-una apan sagdi lang kay sa iyang kalangay nahimamat ko ug nahigala ang usa ka maanyag nga maestra.