Iring

Aduna karon bag-ong murag magbubuhis nga gihatagan og pabor usa ka departamento sa lokal nga kagamhanan sa dakbayan sa Sugbo.

Sigun sa asoy sa akong tinubdan nga mao mismo ang nakasaksi pinangga gyud kaayo kini sila nga bisan ang mga magbubuhis og mga bisita sa maong buhatan hikawan sa hangin nga ilang gikinahanglan aron mauga ang ilang singot nga dala sa grabing kaalimoot sa dapit.

Matud pa sa akong tinubdan mas maayo pa ang iring kay pinangga sa mga enhinyero ug personnel sa Department of Engineering ang Public Works (DEPW) kay sa ilang mga kliyente.

Iya kining nasulti human siya buyaga sa usa sa mga enhinyero sa nahisgotang departamento sa kagamhanang lokal sa dakbayan sa Sugbo.

Sigun sa iyang asoy miadto sila sa DEPW tungod kay giimbitahan sa usa ka tigum.

Tungod sa kainit sa panahon ug kay naglakaw gikan sa Balay Lungsod tabok sa building diin nahimutang ang DEPW nangaligo gyud tawon sila sa singot. Sa ilang pag-abot sa DEPW ilang nakita ang electric fan nga nagtuyok nga nakatutok lamang sa nagtapok nga iring busa nananghid ang usa kanila sa personnel sa DEPW nga iyang ipatuyok-tuyok ang electric fan aron siya ug ang kauban mahanginan.

Apan gibalibaran siya tungod kay ang electric fan para lamang kini sa iring. Tungod sa ilang nadunggog nagtinutokay na lamang sila sa iyang kauban.

Apan wala na gayod siya makaagwanta sa kainit ug kaalimuot, iya na gayod nga gipaatubang ug sa iyang kauban ang eletric fan nga para lang sa mga iring.

Human niya kini gihimo, siya naulawan kay gikasab-an. Maong nakaingon siya sa iyang kaugalingon nga maayo pa diay ang iring kay pinangga pa sa mga taga DEPW kay sa ilang mga kliyente.

Wala man problema kun pahanginan ang mga iring sa DEPW kay pagpakita man kini sa ilang pagka mahigugmaon sa mananap pero kinahanglan pod nga magbutang sila og electric fan para sa ilang mga kliyente.