Kanus-a mohunong sa pataka?
Karong nahinayak nang pipila ka lokal nga mga opisyal sa di pagtuo sa Department of Agriculture (DA) unsaon pagpugong ang pagkatap sa kagaw sa African Swine Fever (ASF), gisalikway na nila ang pasidaan ni Agriculture Secretary William Dar nga makadaot sa nasudnong ekonomiya ang pagbuot-buot nila og ban sa mga karne ug produktong baboy gikan sa Luzon, kinsa na may ilang tuohan?
Kay bisan sa kakuwang nila og pagsalig ang DA nagpabilin nga maoy dunay mga eksperto ug laboratoryo nga labing takos nga moluwas sa P300 bilyones nga industriya sa baboy.
* * *
Di ang lokal nga mga opisyal sa Kabisay-an ug Mindanao ray nagduda ni Dar kinsa nasakpan nga nitago gikan sa publiko ug bisan sa gabinete ni Presidente Rodrigo Duterte sud sa dul-an usa ka buwan sa pagtino sa ilang laboratoryo sa DA nga may ASF ang blood samples sa nangamatay nga mga baboy sa Rizal ug Bulacan.
Bisan si Quezon City Mayor Joy Belmonte nagbuot-buot og deklarar nga may ASF nang iyang dakbayan ug gipapatay ang tanang baboy sud sa usa ka kilometro nga radius sa babuyan nga natakdan.
* * *
Bisan kadudahan si Dar, kinsa eksperto sa mga hardin di sa mga baboy, may mga makamao ang Bureau of Animal Industry (BAI) nga nag-una ni Dar sa DA ug di mahitabo nga mosugot lang kon ilaron na gyod niya tinuod ang katawhan mahitungod sa ASF.
Kun di na sila motuo ni Dar kinsa may tinubdan nila sa kasayuran? Mas suhito ba sila sa industriya sa baboy?
Duna bay ilang kaugalingong mga eksperto ug laboratoryo nga makasihag sa tanang karne ug produktong baboy nga mosud sa ilang teritoryo?
* * *
Gawas pa, kun di sila motuo ni Dar ug sa DA ug bisan sa Malakanyang mahitungod sa ASF sa pagka karon, kanus-a man sila motuo og balik?
Kanus-a man sila mohunong sa pag-umol og mga lagda pinasikad sa ilang pagduda ug pangagpas ug pagtuo nga kinahanglang duna silay himuon?
Labaw sa tanan, kanus-a man makamatngon nga ang pataka nga mga lagda, apil nang pag-ban sa mga produktong baboy nga nahimo sa wa pay ASF, mas makadaot sa industriya kay sa kagaw nga gihimong lusot sa ilang pagpasagad?
* * *
- Latest
