CSBT entrance, exit makalibog

Dugay na kong wala makasulod sa Cebu South Bus Terminal (CSBT), ang dapit nga kaniadto, sa bata pa ko, gipakasama nakong paraiso.

Paraiso tungod kay matag higayon nga ikuyog kong anhing Nanay Totang og pangomprag mga tinarong ginamos didto sa Taboan para dad-on ngadto sa gamay namong tindahan sa merkado sa Balamban, inig abot sa gisakayan namong passengers bus dinhi sa terminal, moderetso man dayon mig sulod niadtong usa sa mga naglarayng kan-anan aron mamahaw.

Ug hasta lamia sa init humay ug pork steak kan-on. Labi na kay arayan og baso nga gisudlag ginaling nga ice aron maoy ipisan sa usa ka botelyang Coke, pastilan, maora gyod kog naanak og dato sa pipila ka minutos.

Kaniadto, walay koral ang CSBT. Wala masemento ang yuta ug walay klarong landong nga kapasilongan. Pero malingaw ka sa mga kantang naglanoglanog sa jukeboxes nga maoy mosugat inig kanaog sa mga pasahero.

Kanhi, sama sa barongbarong sa sotero ang bayhon sa mga tindahan nga naglibot sa CSBT.

Apan dihang si Inday Gwen Garcia ang nakalingkod, isip  gobernador sa Sugbo, iyang gipaguwapa ang maong dapit ug mao na kini ang atong makita karon, diin napahimuslan sa katawhan ang katahom sa pasilidad ug usab nasudlan og dakodakong kita ang panudlanan sa atong gobiyerno.

Samot na ning iyang pagbalik sa Kapitolyo karon. Iyang gipaningkamotan nga mahatagan pag dugang nindot serbisyo ang tanang gumagamitay diha sa guwardiyadong CSBT aron mosamot pag-uswag ang Sugbo.

Hinuon, niadtong pagbisita nako sa CSBT sa miaging Miyerkules sa buntag, dihang migawas na unta ko agi niadtong luag agianan, gibadlong ko sa babayeng guwardiya kay adto gyod ko niya paagia niadtong limitadong pultahan nga may markang: Entrance, Exit.

Wa dayon ko kadungog sa iyang sangpit. Pero dihang nakabantay na ko, mibalik ko sa agi aron adto na mo-exit.

Ang pait lang, kay may pagka-sarcastic ang binadlongan sa maong guwardiya. Nakagisi sa talandugong kasingkasing ning senior citizen nga goyko na.

Sugyot lang. Nindot unta, nga ang Entrance, Exit sa maong lugar padak-an ug ukoparon lakip na kadtong nabakanteng agianan para sa gawas.

Buwahan, wala nay malibog asa agi. Hinaot unta, nga maaksiyonan ni, Inday Gob. Gwen!