EDITORYAL - Nagmika ang DA batok ASF?

Dili man tuod makamatay sa tawo kining gikahadlokan sa mga namuhi og mga baboy nga African Swine Flu o hog cholera, nakaapektar kini sa ilang panginabuhian tungod nabalaka ang mga konsumidor bisan pa sa mga pasalig nga di kini makatakod sa tawo.

Ang ASF usa ka matang sa sakit nga motakboy lang sa mga baboy ug dili sa tawo sumala pa ni Dr. Daniel Rock, sa Department of Pathobiologies University sa Illinois sa Amerika.

Wa say ebidensya o wa pay kaso nga natala nga ang tawo nahimong ‘carrier’ sa maong sakit ug maoy nakatakod sa mga baboy.

Apan gituohan nga ang iresponsableng gipanghimo sa mga tawo sama sa pag-import og karneng gikan sa mga nasud nga naapektahan sa ASF maoy hinungdan sa pagkatap niini dinhi.

Sumala pa sa World Organization for Animal Health (Office International des Epizooties) OIE, 80 porsiyento sa natalang nangamatay nga baboy tungod sa ASF sa tibuok kalibotan gikan lang sa Agosto 30 hangtud Septiyembre 12 dinhi gikan sa Pilipinas. Nag-unsa ra man diay ang mga kadagkoan sa DA?

Karon ang mga nagkadaiyang local government units wala na kapaabot pa sa DA nga moisyu og mga guidelines pagkombate sa maong sakit kay sila na mismo ang niaksyon pinaagi sa pagpatuman og imported pork ban ug gihigpitan ang pagsulod sa mga baboy gikan sa mga rehiyon nga natakboyan sa maong sakit.

Paabuton pa ang DA hangtud mauwahi na hinuon ang tanan, liboan naka mga baboy ang nangamatay sa nanglabay nga mga buwan unya hangtud karon wala pa gihapoy napagawas nga klarong plano kung unsay buhaton pagpakgang pagkatap niini?

Husto ang gihimo sa mga LGUs sama sa Provincial Capitol sa Sugbu ug Cebu City nga nag-ban dayon sa mga imported meat.

Nungka paabuton pa ang taga DA nga mohimo sa ilang trabaho.