OSCA ID ra ang gikinahanglan

Hangtud karong adlawa nagpadayon ang mga disinformation (ambut tinuyo ba ni) bahin sa nalangan nga pagpanghatag sa financial assistance sa mga senior citizen. It seems nga ilang gisakyan ug gipahimuslan ang kalangan pinaagi sa pagsabwag sa mga pagduda ug makalibog nga mga kasayoran.

Una, kun kahinumdom mo, ilang gipalakaw ang estorya nga gikanselar na ang financial assistance, bisan tuod og nasayod sila mismo nga usa na kini ka ordinansa, ug nagkinahanglan og laing ordinansa nga mag-repeal niini.

Sa ato pa, kun adunay naglaraw pagkanselar niini, ug bisan adunay legal basis ang pagkanselar, dili kini mahimo diha-diha dayon.  Unya, dihay misugilon nga gipa-fill up kuno sila’g form, otherwise dili sila makakobra sa financial assistance. Klaro nga disinformation.

Lain pa, gikinahanglan kuno ang pink slip (ambut unsa ni), aron makadawat sa financial assistance. Ug karong bag-o, dihay nangutana kun tinuod ba nga gikinahanglan ang birth certificate aron makakobra sa cash aid.

Matud ni Jeffrey Ocampo, Executive Director sa OSCA ning dakbayan, sama sa nangaging pagpanghatag sa financial assistance, ang OSCA ID lamang ang gikinahanglan.        

Atong amigo nga Kapitan sa Barangay ug radio commentator sa DYRF, si Frank Benedicto, nga usa usab ka senior citizen nikomedya pagpangutana kun dili ba igo nga ang nawong lang sa senior citizen ang tan-awon ... nganong magkinahanglan pa man og birth certificate?            

At any rate, makaginahawa na ta’g luag ugma. Matud ni Frank, makabayad na ta sa atong mga utang, makapamalit na sa maintenance nga mga tambal, ug si Dodong makapadayon na pagpusta sa Lotto.

Natingob ang tulo ka bulan. Matud pa, it was worth the waiting after all.

* * *

Niadtong usang adlaw, sa akong pagpangompra  akong gilakip ang duha ka lactose-free nga gatas. Sa akong pagbayad gipangayuan ko sa purchase booklet  ug OSCA ID kay ma-discounted ang gatas. Lipay kaayo ko. Nidali ko’g kuha sa akong booklet gikan sa akong kauban.

Actually, matag pangompra nako’g grocery, di gyud ko magdaladala sa booklet  tungod kay gawas nga gamay ra ang discount, wa ko maka-memorize unsa nga mga grocery items ang ma-discounted.

Ug lagmit, kasagaran natong mga senior citizen wala usab masayud sa hingpit nga talaan sa mga grocery items nga ma-discounted.

Ang Joint DTI-DA Administrative Order No.10-02 nagbutyag niining maong mga grocery items. nga nabutang sa category nga “Basic Commodities.” Ania: 1.rice; 2. corn;  3. bread; 4. fresh, dried & canned fish; 5. Fresh pork, beef & poultry meat ; 6. Fresh eggs;  7. Fresh & processed milk; 8. Fresh vegetables including root crops;  9. coffee & coffee creamer; 10. Sugar; 11. Cooking oil; 12. Salt; 13. Powdered, liquid, bar laundry & detergent soap; 14. Firewood and charcoal (kahoy nga sugnod ug uling); 14. Candles. 

Samtang ang “Prime Commodities” naglakip sa fresh fruits; flour; dried, processed & canned pork, beef & poult ry meat; dairy products; canned sardines, tuna; noodles;  onions;  garlic;  geriatric diapers;  herbicides; poultry , swine & cattle feeds; veterinary products for poultry, swine & cattle; nipa shingles;  plyboard & construction nails; batteries; electrical supplies & light bulbs; ug steel wires.

Nahibawo ba mo niini?  Ako, wa!