Nagmika sa trabaho

Daghang kontraktor og mga infrastructure projects sa kagamhanan nga nagpabaya lang ug nakahatag sila og risgo ngadto sa publiko, ug wala usab makabadlong kanila ang mga nagmika nga hingtungdang opisyal.

Sama pananglit niang road concreting project sa España Street gikan sa Barangay Parian paingon sa D. Jakosalem, lawom ang lungag nga gikuykoy nila sa karsada, apan wala gyud sila magbutang og signage aron ang mga sakyanan sa D. Jakosalem dili mameligro.

Ikaduha, ang kontraktor sa laing road concreting project sa Mabini Street gikan sa eskina Colon Street paingon sa Cathedral, dugay na nga mora’g gibiyaan, wala humana, apan ang karsada sa unahan ilang gitusaktusak sa lungag.

Imbes “two-way” ang maong karsada, nahimo na lang nga “one-way” ug ang mga motorista nag-antos sa kasamok nga wala na man ipadayon ang trabaho. Unya, nganong ila man nga gipangtusak-tusak sa lungag ang karsada nga dili pa man diay nila kini trabahoon?

Nakakita ba kaha niini ang kadagkoan sa Department of Engineering and Public Works? Ang atong mga opisyal sa City Hall, nakakita ba niini?

Husto kaayo ang resolusyon ni Konsehal Eugenio Gabuya Jr. nga nag-awhag sa mga kontraktor sa mga proyekto sa kagamhanan nga dili sila magmika sa ilang trabaho.

Didto sa ubang nasud, layo ka pa gani sa dapit nga may “ongoing excavation project” may placard na nga nagpahibawo sa mga motorista nga sa unahan dunay proyekto nga makapeligro kon dili magbantay. Nganong dili man kini ipatuman dinhi?

* * *

Nagpahigayon kagahapon ang Cebu Market Vendors and Development Cooperative (CEMVEDCO) og libre nga “boodle fight” kun kinan-anay og dagko kaayong pork barbecue.

Gipasabot ni CEMVEDCO chairman Erwin Gok-ong nga gusto lang nila nga ipasalig sa publiko nga walay African Swine Flu virus ang mga karne nga ilang gibaligya ug dili angay’ng mahadlok ang mga pumapalit.

Mikunhod man gud tawon ang halin sa mga sakop sa CEMVEDCO kay ang uban nilang mga suki, nabalaka tungod sa sige nga madunggan nila sa balita kabahin sa African Swine-Flu virus.

Ikaduha, bisan pa og ibutang nato nga may mga ASF virus ang usa ka karne, dili kini motakboy ngadto sa tawo, adto ra sa mga baboy. Pastilan, duna gyuy pwerte kaayo nga nakakaon sa lami kaayong barbecue uy.

Unya, ang mga chorizo sab nga gihimo sa Meat processing plant sa CEMVEDCO luwas ug limpyo gyud kay gihatagan man gani sila og certification gikan sa Bureau of Food and Drugs (BFAD).

Gitugotan ang CEMVEDCO nga makabaligya sa ilang mga produkto sa ubang mga probinsya. Nakakita man ko, limpyo gyud tinuod ang ilang Meat Processing plant. Busa, ayaw mo kahadlok uy.