Makaagak bang buta sa laing buta?

Ginaingon nga ang  bibliya kahayag sa atong kinabuhi. Apan subo palandungon nga sa minilyong Romano Katoliko, pipila lamang ka mga magtutuo ang adunay bibliya sa ilang panimalay.

Unya kon nagtener man, pipila lang kaha ang midumdom pagbasa niini kanunay? Ug kon mibasa, hipalgan ba kaha ang langitnong lamdag nga mag-iwag sa giatubang tang danglog dalan nga atong pagalaktan?

Ang walay paghunong nga pagnegosyog shabu sulod ug gawas sa prisohan, ang padayong pagpamatay sa mga kinabuhing binuhat sa Diyos, ang pagpunayg pasipala sa katahom sa kinaiyahan nga maoy hinungdan sa pagdahili sa yuta, baha, lunop ug ubang katalagman nga tawo na ang naghimo, igo na kining makatug-an, nga ang kinabag-ang bahin sa katilingban, wala nay basabasag bibliya. Busa, wala na makaila sa Ginoo. Kadto lang nasaksihan sa taga Tabunok, Talisay City nga mga magsakyanang molabay sa ilang basura ngadto sa sapa sa Mananga nga bag-ohay pang gilimpiyohan nilang Talisay City Mayor Gerald Anthony ‘Samsam’ V. Gullas Jr. ug sa iyang ginsakpan, kamatuoran kini nga ning yuta nga atong gipuy-an, daghang buta ang wala makakita sa bulawanong kahayag nga naglumlom sa mga panid sa balaang basahon. 

Hinungdan, nga padayon ang mga badlongon paghugawhugaw sa nagdagang tubig sa sapa nga mapuslan unta ang katin-aw niini sa katawhang mahigugmaon sa kinaiyahan. Ang makalagot, kay kon dili mahunong kining ilang pagkamasupilon, mapuno-alihan na sab ang agianan sa tubig sa sapa, diin kon mobuhos ang kusog ulan, imbes molahos ang dagan sa sulog ngadto sa dagat, moawas hinuon sa mga suba, kanal o drainage, ug lunopan ang kadalanan ug kabalayan, diin ubay-ubayng kinabuhi ang maalaot. Maayo gani, kay si Samsam dili sama sa ubang lider nga buta. May panahon siya pagbasa ug pagpaminaw sa mga pulong sa Ginoo. Busa, nahimo siyang kahayag nga maoy moagak sa mga buta ngadto sa matarong dalan sa kinabuhi.

Pagkahibalo ni Samsam nga gilabayag basura ang Mananga river, iya gilayong giawhag ang mga residente nga dili magpanuko pagsumbong sa mga buloyagon ngadto sa kapolisan. Usab, nagplano nga pataoran og mga CCTV cameras ang palibot aron sayon na lang unya sa pagsikop sa mga malapason. Kay niini lang paagiha nga ang buta makakita.