EDITORYAL - Peligro sa seguridad

Way kawatang moangkon dayon sa sala kutob sa ilang mahimo, kun moangkon man uwahi na ang tanan ug duna nay dili maayong epekto ang ilang nahimong kalapasan.

Ning bag-o lang, daghang naalarma ilabi na ang mga senador pagkasayod nga ang mag-instalar sa mga pasilidad sa komunikasyon sa mga kampo sa Armed Forces of the Philippines mao ang Dito Telecommunity Corp.

Ang maong kompanya mas naila kaniadto nga Mislatel ang ikatulong telecommunications company nga tuyong gipasulod dinhi sa nasud aron putlon ang monopoliya sa duha ka telco giants nga Globe ug Smart.

Apan ang maong kompanya gipaluyohan sa China. Angkunon man o dili, dili komportable ang mga Pilipino sa relasyon karon sa duha ka nasud tungod sa kasungian sa West Philippine Sea bisan pa man sa pakigsuod sa administrasyong Duterte sa maong nasud.

Dunay mga senador nga nanawagan nga maghimo’g senate inquiry bahin niini tungod sa posibleng ‘threat to national security.’

Mismo si Department of National Defense Secretary Delfin Lorenzana nanghunaw sa isyu kay matud niya wala siya masayod bahin sa maong kasabotan.

Dili sab garantiya ang mga nakabutang sa kasabotan, kay kun masakpan man o dili nga gilapas kining mga gisaad, pareho ra og kadaut nga mahiaguman sa seguridad.

Naalarma ang mga senador tungod kay matud pa nila ang China adunay balaod nga nagmando sa tanang mga kompanya sa ilang nasud, gobiyerno man o pribado apil na ang mga indibidwal nga kinahanglang mangolekta gyud sila og ‘intelligence information’ para sa ilang nasud bisan asa pa sila maabot.

Ang maong balaod mao ang National Intelligence Law of 2017 ug ang Counter-Espionage Law of 2014.

Kung tinuod kini, may punto ang mga senador ug angay ikonsiderar ang ilang kabalaka.

Kini tungod kay samtang patas ang balaod pagtan-aw sa tanang mga nagnegosyo dinhi sa nasud, lahi na kun ang seguridad sa nasud na ang hisgotan.