Makadawat ba og retirement ang partime employee?
Dear Atty. Divine:
Ang akong iyaan gikatakda nang mo-retire next year. Napulo ka tuig na siyang nagtrabaho sa iyang company but part time lang tungod kay duna man gud siyay kaugalingong tindahan sab nga giatiman. Kun moretiro ang akong iyaan makadawat ba sab siya og retirement benefit gikan sa iyang company bisan kun part time employee lang siya? Daghang salamat.— Jill
Dear Jill,
Basi sa Republic Act 7641 kun ang empleyado moabot na og 60 ngadto 65 years old nga maoy mandatory age for retirement og nakaserbisyo na siya og dili mominus lima ka tuig sa iyang company then mamahimo na siyang moretiro sa iyang trabaho ug ang kompaniya obligado nga mohatag kaniya og retirement benefits basi sa ilang retirement plan. Kun way retirement plan ang employer dapat mohatag ang employer og 1/2 month per year of service isip retirement pay sa kawani. Basi sa implementing Rules sa maong balaod kini nagkanayon nga covered niini ang tanang empleyado sa private sector regardless sa ilang status og designation lakip na ang mga part time employees. Buot ipasabot nga ang imong iyaan makadawat gyud og retirement pay sa iyang gitrabahuan bisan kon siya part time worker lang. Thanks and God bless. —Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.
ARANGKADA Leo Lastimosa
Dinastiya ni Humabon
Sama sa hamtong nga mga politiko sa bag-ong Sugbo nga nabalaka sa talisawop nilang adlaw ug nahadlok kinsay mopuli nila sa gahom, si Rajah Humabon may samang palas-unon sa labing una nilang panagtagbo ni Ferdinand Magellan 498 ka tuig ang nilabay.
Gihulagway ni Antonio Pigafetta, ang Italyanong makinaadmanon nga nikuyog sa pagdunggo ni Magellan sa Sugbo, nga hamtong si Humabon ug nahingawa nga way lalaking anak nga makapuli niya. Kay pulos babaye ang upat ka anak sa iyang unang asawa.
* * *
Sama sa nisunod nga mga pangu sa Sugbo, gitino ni Humabon nga magpabilin ang iyang pamilya sa gahom bisan kon mobiya na siya sa kalibotan pinaagi sa pagtudlo nang daan og puli. Giila ni Pigafetta sa iyang librong Relazione del Primo Viaggio Intorno Al Mondo ang napilian ni Humabon isip prinsipe nga mao ang iyang pag-umangkon nga si Tupas:
. Nga anak sa igsuon ni Humabon nga si Bendahara;
. Nga giminyo ni Humabon sa iyang kamaguwangang anak nga babaye nga ginganlan og Humamai; ug
. Nga nakahatag na ni Humabon og apo nga babaye dihang niabot silang Magellan ug kaubanan.
* * *
Apan si Fray Rodrigo de Aganduru Moriz, misyonerong Agustino nga nakapuyo uban sa mga Sugbuanon 80 ka tuig human sa pagkamatay ni Magellan ug nakahinabi sa mga sumusunod ni Humabon, niila ni Tupas nga anak ni Humabon.
Si Moriz nga gikutlo ni Dr. Danilo Madrid Gerona sa iyang librong Ferdinand Magellan nga si Humabon ginganlan sab og Pantupas, o amahan ni Tupas, agad sa karaang taras sa pagsagop sa mga amahan sa ngan sa ilang kamaguwangang anak nga lalaki.
* * *
Si Rajah Tupas, anak man o pag-umangkon ni Humabon, mao nay hawod sa Sugbo sa pagdunggo ni Miguel Lopez de Legazpi sa Sugbo niadtong 1565. Kay giingon man ni Pigafetta nga 24 anyos si Tupas niadtong 1521, sa ato pa 68 anyos na sa iyang pakiggubat ni Legazpi.
Di ikahibung nga samtang mahigalaon si Humabon ni Magellan nisukol si Tupas ni Legazpi. Kay prinsipe na si Tupas dihang gipaluba ni Humabon ang mga Katsila nga nanganaog sa mga barko ug nitambong sa piging nga iyang gidalit sa baybayon sa Sugbo human napatay si Magellan sa Mactan.
* **
- Latest
