Magbantay di magyagaw
Wa pa matapos ang kalibotan bisan nasudlan na ang Pilipinas sa African Swine Fever (ASF). Ang natino nga mga kaso sa ASF nahimutang sa mga lalawigan sa Rizal ug Bulacan ug gipasalig sa nasudnong gobiyerno nga gipatay na ang tanan nga natakdan nga mga baboy ug gitanggong na ang ubang mga baboy nga mahimong naapektahan sab.
Atubangan sa kalangay sa Department of Agriculture (DA) nga nakahatag sa tukmang kasayuran sa ASF, makaginhawa ta og luag apan di lang angay nga mokumpiyansa sa ilang pasalig nga nagpabilin pa nga luwas sa ASF ang Sugbo ug Central Visayas.
* * *
Apan di ta angay nga magyagaw ug magkaguliyang. Di ta angay nga motuo sa bisan unsa na lang nga panghadlok.
Di ta angay nga mohunong sa pagpamalit og karneng baboy ug mohimo sa ubang mga lakang nga makahulga sa P200 bilyones nga industriya nga gisaligan sa panginabuhi sa minilyon ka katawhan.
Sa samang higayon di sab ta magpataka og pamalit sa mga karne ug putaheng baboy gikan sa kadudahan nga mga tinubdan.
Motabang ta og bantay nga way mabaligya dinhi nga mga karne ug produktong baboy nga gikan sa mga nasud nga naigo na sa ASF.
Kanunay tang magsusi kon ang mga karne ug produktong baboy gitugotan ba sa National Meat Inspection Service (NMIS) ug Food and Drug Administration (FDA).
* * *
Samtang di makadaot sa tawo, ang kagaw sa ASF bangis ug paspas nga mopuo sa atong mga baboy.
Kay wa pa may tambal ni bakuna batok sa ASF makatabang sa tanang hingtungdan ang pagsabot sa talagsaon nga lahutay sa iyang kagaw:
• Mabuhi og hangtod sa 60 ka adlaw sa delata nga mga karneng baboy;
• Molungtad og 104 ka adlaw sa frozen nga karneng baboy; ug
• Magpabiling buhi hangtod sa 399 ka adlaw sa Parma hams.
* * *
19 porsiyento lang sa mga kaso sa pagkatap sa kagaw ang nanukad sa direktang tinakdanay sa mga baboy, mas daghang kagaw nga nitapot sa mga kawani, mga sakyanan ug ubang kahimanan sa mga baboyan.
Nikatap sang ASF pinaagi sa lamaw gikan sa biyang pagkaon nga gilawog sa mga baboy ug mga produktong baboy nga may ASF nga nakasud sa mga pantalan ug tugpahanan.
* * *
- Latest