Napupos ang lana

Sama sa nangaging mga torneyo, pakyas na usab ang Pilipinas pagpakita og maayong labok sa FIBA World Cup, ang labing prestihiyosong kompetisyon sa basketball sa kalibotan, nga kamulong gipahigayon didto sa China.

 Niining kasamtangang torneyo, gidimalas pag-ayo ang Gilas Pilipinas, ang atong national team. Kini tungod kay bisan usa ka dula wala gayud kini makadaug. Gani, gilampurnas ang atong kuponan sa mga team gikan sa Italy ug Serbia.

Ultimong sa mga koponan gikan sa Tunisia ug Angola wala gihapon kaugpo ang Gilas.

Ug karon, pabiling anaa sa ilalum sa standing ang atong national team.

Dili kini maayong tilimad-on gumikan kay motiurok gayud ang atong reputasyon isip usa sa mga banggiitan sa basketball dinhi sa Asia.

Angay na lang natong dawaton ang kamatuoran nga ang Pilipinas wala nay nahut sa international competition sa basketball.

Paubos na ang atong lana ug dili na kita makasugakod pa batok sa mga nagkaasenso nga mga koponan sa ubang kanasuran.

Kaniadtong mga dekada singkwenta ug saysienta, usa ang Pilipinas sa mga nasud nga gikaintapan sa kalibotan sa natad sa basketball.

Gani, sa Asya kita ang hari niadtong mga panahona sa maong paugnat sa kusog. 

Apan nausab na ang panahon. Kaniadto ang ka idlas ug ka kusog modagan maoy dakong advantage sa atong mga magdudula.

Karon dili na sila makabasta batok sa mga tag-as nga mga player sa ubang kanasuran.

Gani, nagkapuliki kita’g pangita og mga tag-as nga mga langyaw nga adunay dugong Pilipino aron nga maoy atong isakbang sa international competitions. Apan wala gihapon magsilbi kining maong estratehiya. Hinuon, dinhi sa Southeast Asia, kita ang pabiling  hari sa basketball.

Panahon na nga atong iwakli ang atong konsentrasyon sa basbetball.

Ato na lamang gakson ang realidad nga wala na kitay ikabuga batok niadtong mga tag-as ug nagkaabtik nga mga atleta sa ubang kanasuran.

 Adunay daghang sports nga angay natong palamboon nga makahatag nato og dakong dungog sa international nga kompetisyon.

Kini tungod kay wala kitay kapaingnan kon pabilin kitang nag-concentrate sa basketball.