Kun kita na gani ang pasundon

Septiyembre 8, 2019: Ikakawhaag-Tulo nga Domingo sulod sa tuig

Mga Pagbasa: Kin. 9;13-18b

Sal. 90/Fel. 9;10,12-17/Lk. 14;25-33

Mura’g malisud gayud kaayo labina kun demanding kaayo ang atong gisundan. Kini tungod kay sa atong naandan karong mga panahona, buot natong mamahimong komportable sa tanan nga atong pagahimoon, gani buot nato nga mamahimong dali ang tanan alang kanato.

Apan lahi ang ebanghelyo karong Dominggoha. Ang ebanghelyo nipahinumdom kanato sa dakong balighot sa pagkasumusunod sa giila natong hari. Buot natong mosunod sa hari nga nihatag og dakong bili sa krus ingon nga sukaranan sa matag tinun-an sa dili pa siya moingon nga iyang sundon ang iyang magtutudlo.

Ang krus sa tawhanong mga mata simbolo sa kauwawan. Gawas nga simbolo kini sa kauwawan ang matag krus diay simbolo usab sa kasakitan. Tiaw mo na nga dili gyud diay lalim ang mopas-an sa krus sa aktwal nga kahimtang. Papas-anon ka pa ug inig abot nimo sa dapit nga gitagana alang kanimo adto ka didto ilansang ug patyon. Butang nga nasinati sa atong Ginoo sa iyang kapanahonan kaniadto.

Apan alang kanatong mga Kristohanon, ang krus simbolo sa kadaugan kay didto sa balabag sa krus gibuntog ni Jesus ang kamatayon, namatay siya didto aron kita mabuhi, namatay siya didto aron kita magpabiling maluwas gikan sa gahum sa dautan. Ang iyang kamatayon sa krus mao man ang iyang halad isip bayad sa atong mga sala. Namatay siya aron kita mabuhi.

Gipadala sa Dios ang iyang bugtong anak aron mahatagan og katumanan ang Diosnong laraw sa kaluwasan alang kanatong tanan, aron gikan niini matukod ang gingharian sa gugma, pasaylo ug kalooy aron ang matag linalang ang mahiagom sa panalangin ug kalooy gikan sa Dios.

Kun ang Amahan tungod sa iyang dakong gugma alang nato ang nihatag sa iyang anak nga giisip niyang mahinungdanon, kitang mga tawo ang maantigo ba kahang mohatag sa bisan unsa o kinsa nga giisip natong mahinungdanon? Karong adlawa atong gisaulog ang Adlaw Natawhan ni Mama Maria mao nga angayan lamang nga siya atong awitan og Happy Birthday Mama Mary!