Estate tax amnesty pwedeng ma avail sa wa pa makabayad og estate tax

Dear Atty. Divine,

Duna mi na inherit nga property gikan sa among mga ginikanan. Unang namatay ang among papa 7 years ago ug among mama namatay sab after 2 years. Until now wa pa namo mabayri ang estate tax kay wa pa mi budget. Lately,  nakadesisyon mi nga magbaligya og portion sa property aron among ibayad sa estate tax og aron ma-process namo ang pag-transfer sa property. Ang among pangutana attorney kun unsay una namong buhaton? Dako ba mi og mabayran sa estate tax considering nga 7 years nang namatay among amahan ug si mama 5 years na sab nga namatay? Daghang salamat.

Lorna

* * *

Dear Lorna,

Ang una ninyong buhaton mao ang pag execute og Extrajudicial Partition sa properties nga inyong na inherit ug pirmahan kini ninyo tanang heirs ug panotaryuhan. Human niini,  inyong i-submit sa BIR alang sa computation sa Estate tax. Timing kaayo kun karon ni ninyo iprocess kay maka avail mo sa tax amnesty law kon RA 11213, nga diin wa moy bayran nga interest sa estate tax bisan kun dugay na namatay ang inyong ginikanan. So, at least, dili ra dako ang inyong bayranan kay kasagaran sa makadako sa bayranan sa estate tax mao man ang interest. Basi sa maong balaod kadtong namatay on or before December 31, 2017 ug wa pa makabayad sa estate tax as of December 31, 2017 maoy makapahimus sa  tax amnesty law so maka avail gyud mo niini kay ang inyong parents namatay man before December 31, 2017. Thanks and God bless.

Atty. Divine

* * *

Alang sa inyong pangutana, ipadala lang sa Legal Corner sa Banat News or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.