Habal-habal

Gusto gyud ni Konsehal Raymond Alvin Garcia nga ma-regulate ang operations sa mga  “habal-habal” dinhi sa siyudad.

Daghan na nga mga konsehal ang miduso og ordinansahon kabahin niini, apan wala gayud maaprobahi sa konseho.

Bisan si LTO Regional Director Vic Caindec mihulagway nga nindot ang gihimo sa dakbayan sa pag-regulate sa mga habal-habal.

Unsa ba ang buot ipasabot sa pulong “regulate?” Kini mao ang pag-organisar sa mga driver sa habal-habal aron sila ikontrol sa Local Government Unit.

Pananglit dili sila paparkingon sa usa ka dapit aron nga dili sila makahasol sa ubang mga motorista kay magpundok sila daplin sa karsada.

Mahimo usab nga ang siyudad o lungsod, pinaagi sa iyang mga opisyal, mo-regulate sa mga habal-habal driver sa ilang dapit pinaagi sa pagpasul-ob kanila og mga uniporme ug pagpasunod kanila og mga lagda.

Nindot nga sun-on nato ang gihimo sa mga opisyal sa Thailand nga ang ilang mga habal-habal didto, gipasul-ob og uniporme unya ang lisensya sa driver gipakopyahan ug gipadako, unya gipapilit sa ilang uniporme sa likud. Dili ba maayo?

Unya, kinahanglan nga kun ma-regulate man gyud, ang mga driver sa habal-habal may lisensya gyud ug rehistrado ang ilang mga motor.

Apan mao ni ang timan-i ninyo. Kon mahitabo nga madakpan kamo sa paglapas sa balaod sa pag-drive og sakyanan, ayaw gyud mo pagreklamo  nga dili ka madakop kay gi-regulate na sa siyudad ang habal-habal.

* * *

Nakabantay ba kamo nga adunay mga motorista nga migamit og plate numbers sa ilang sakyanan nga unom ka numero?

Sama pananglit sa 070108.   Gitug-anan ko ni higalang  LTO Cebu City district head Joel Maloloy-on nga ang mga driver sa mga sakyanan nga migamit niining mao nga plate numbers mahimong dakpon ug pamultahon.

Ang gitugot nga temporary plate numbers sa mga motorsiklo mao ang paggamit sa motor vehicle file numbers, sama sa 0701-3521769 nga maoy sagad nato nga makita sa mga motor.

Apan sa mga four-wheeled vehicles, ang ipagamit nga temporary plate mao ang conduction permit nga giisyu sa LTO sa maong sakyanan.

Kining akong gihimo pagtabang ni nako kaninyo aron dili kamo madakpan ug makabayad og dakong kantidad sa multa.