Kabungkagon nga relasyon

Mipagawas og kamandoan si Cebu City Mayor Edgardo Labella nga nagporma sa Sinulog Board nga apil sa nalangkob mao si Gobernador Gwendolyn Garcia, unom ka mga tinudlo sa mayor, sakop sa konseho sa dakbayan sa Sugbo ug mga representante sa Sinulog Foundation, Land Transportation Office, Land Franchising and Regulatory Board, Cebu City Traffic Office, Department of Education, Philippine National Police ug Armadong Kusog sa Nasud.

Giklaro ni Labella nga dili sapaw sa trabaho sa Sinuog Foundation ang giporma niyang Sinulog Board.

Apan mireklamo si Bise Mayor Mike Rama tungod kay wala siya sultii ug konsultaha ni Mayor Labella sa giporma niining Sinulog Board ug giatol ang pagporma niini dihang didto siya sa gawas sa nasud. Si Mike Rama kun wala ko masayop 16 na ka tuig nga chairman sa Sinulog Foundation Incorporated.

Bisan tuod og iya na nga gahom ni Mayor Labella ang pagporma og Sinulog Board og seguro wala na kinahanglana ang pagpahibawo ug ang pagkonsulta niya sa iyang Bise Mayor nga si Mike Rama. Apan isip kauban ug iyang katambayayong sa pagdala sa renda sa kagamhanan sa dakbayan sa Sugbo angay ug matarong lamang seguro nga pahibawon sa mayor ang bise mayor ilabi na nga dili ikalimod nga aduna nay taas nga kasinatian si Mike sa pagpadagan sa Sinulog.

Dili pangutana dinhi kinsa ang mayor ug usa ang iyang gahom kun dili  ang pagpahibawo lamang sa iyang mga kaabag sa pagpadagan sa kagamhanan sa dakbayan kay basin pa diay may ikasugyot kini nga makahatag og dugang kahayag sa laraw nga pagahimuon sa mayor.

Sa akong nakita karon sa City Hall sa pamunoan ni Labella sama sa gitugotan niini nga adunay division ang pagpadagan sa iyang administrasyon. Kanunay nakong madungog ang tabi sa iya ra usab nga mga kaalyado ug suod sa pamilya ang segregation sa iyang mga kaalyado ug ni Rama.

Ang isyu sa Sinulog Board dili unta makadugang sa isyu sa segregation sa ilang mga tawo nga magduslit unya sa pagkabungkag sa ilang panagkuyog.