EDITORYAL - Frontliners sa serbisyo publiko

Daghan sa mga programa ug kampanya sa gobiyerno ang dili maabot sa mga angayang mahatagan tungod sa politika diha palang sa mga barangay.

Ang sagad lang makadawat mao lang kadtong mga “duol sa luwag” samtang kadtong layo sa kasing-kasing sa naglingkod nga mga kapitan kataposan sa prayoridad o ba kaha wala gyuy madawat.

Sagad nga hikawan mao kadtong mga kontra partido o kadtong nahibaw-an nilang wala mobotar kanila sa miaging piniliay.

Dili lang mga tabang pinansiyal ug uban pang mga programa para sa mga kabus ang usahay gihikaw, kondili hasta na ang mga batakang serbisyo.

Kini sama sa family planning, pagpamakuna, kampanya batok sa sakit nga dengue, environmental concerns sama sa hustong paghipos sa basura, paglimpyo sa mga kanal, mga paugnat sa kusog alang sa Sangguniang Kabataan, peace and order, anti-drug campaign, anti-rabies vaccination campaign, ug daghan pang uban.

Kun ingon gani niini ang taras sa mga kapitan, mas molabaw pa ang ilang mga gipangkuha nga mga barangay workers, gikan sa tanod hangtud sa ilag secretaries.

Kining mga empleyadong kinuha sa mga kapitan, gikuha dili tungod kabalo sila sa trabaho kondili tungod kay suod sila niini ug nakatabang sa nakalabay nga eleksyon.

Duna say mga kawani sa barangay nga mas hawod pa sa ilang mga kapitan ug dili makamaong moatiman o moabi-abi sa mga tawong nidangop sa ilang buhatan.

Tungod ba kaha nalubong sila sa utang kabubut-on kay ang kapitan maoy nagpasulod kanila sa trabaho o tungod ba sa personal nga kayugot kay “taga pikas” sila nga pundok?

Ang ingon niini nga mga taras sa mga kawani sa gobiyerno diha palang sa barangay level maoy  hinungdan nganong daghan sa mga programa ug proyekto sa nasudnong kagamhanan ang dili makaabot sa kinaubsan.

Angkunon man o dili sa mga barangay kapitan, dili gyud sila makalimod nga duna silay ingon niini og batasan nga mga kawani sa ilang barangay hall.

Sila ra ba untay frontliners sa serbisyo publiko sa gobiyerno.