Baboy

Gipatuman sa lalawigan sa Sugbo ang pag-ban sa mga buhing baboy apil na ang produkto nga ginama sa karneng baboy sulod sa usa ka gatos ka adlaw.

Apil na ang mga processed meat gikan sa mga nasod nga adunay kaso sa African Swine Fever kon ASF.

Kining maong lakang isip pag-pakgang nga makasulod sa Sugbo ang balatian nga naghulga sa industriya sa baboyan sa lalawigan sa Sugbo.

Niadtong nakalabayng semana nagpatawag og tigom si Governor Gwen Garcia sa tanang mga stakeholders diin giumol usab ang Task Force ASF.

Nunot usab kini sa kaso sa pagkamatay sa mga baboy didto sa Bulacan ug Rizal nga gitoohan nga ASF.

Bisan og wala pay kompirmasyon ang Department of Agriculture nga ASF ba gyud ang hinungdan apan mas maayong mapangitaan og solusyon nga dili na kini mokatap pa sa laing dapit.

Ang ASF dili makaapekto sa panglawas sa mga tawo apan dako kaayo kini og epekto sa panginabuhi sa mga tawo.

Una ang mga hog raisers o namuhi og mga baboy, apil na ang mga konsumidor nga mahilig kaayo og baboy.

Pastilan pagkalami sa litson ug humba unya dili na ta kakaon niini? Bitaw dako kaayo og epekto sa ekonomiya kon maigo na ang ASF sa industrisya sa baboyan.

Gikinahanglan nga magtinabangay kitang tanan sa pagbantay nga dili makalusot ang sakit sa baboy dili lang nato isalig ang tanan sa kagamhanan.

Kadtong naay mga paryente gikan sa gawas sa nasod ilabi na gikan sa mga apektadp sa sakit ayaw lang gyud pagpalusot og mga processed meat sama sa delata.

Sa mga namaligya palihog sa pag-dispose nalang sa mga delata nga nagdala og hulga sa hog industry.

Kong magtinabangay kita kaya ra kaayong mapugngan ang pagsulod sa ASF sa atong lalawigan.