Nagpabiling sensitibo

Miulbo ang kontrobersiya human sa balita nga posibleng makagawas na sa prisohan si kanhi Calauan, Laguna mayor Antonio Sanchez.

Daghan ang nahibulong sa maong kasayuran tungod kay ang pagtuo sa kadaghanan nga madugta siya sulod sa bilanguan human siya gisilutan sa korte og siyam ka reclusion perpetua tungod sa mga kasong pagpanglugos ug pagpatay.

Ang usa ka reclusion perpetua tumbas og 40 ka tuig busa ang kinatibuk-an niyang silot mosumada og 360 ka tuig nga pagkabilanggo. Si Sanchez uban sa laing unom niya ka mga sakop namatud-ang guilty paglugos ug pagpatay sa tinun-an sa University of the Philippines nga si Eileen Sarmenta  ug sa uyab niini nga si Allan Gomez niadtong 1995.

Gawas niini nakonbikto pud siya niadtong 1996 pagpatay ni Nelson Peñalosa, lider sa iyang kaatbang sa politika, ug sa anak niini.

Si Sanchez napriso sulod pa lang sa 26 ka tuig kini maoy hinungdan nga nag-alburoto ang publiko human masayod nga posible na siyang makagawas sa bilanguan.

Ang gibasihan mao ang Republic Act 10592 o ang good conduct time allowance (GCTA).

Basi sa maong balaud nga napasar niadtong 2013, ang mga priso nga nagbinuotan mamahimong kahatagan og pabor nga makagawas og sayo kaysa ilang sentensiya.

Dunay formula nga gisubay niini ang Department of Justice nga maoy tagdumala sa Bureau of Correction.

Ug basi sa ilang computation nilapas na gani kuno si Sanchez og siyam sa 40 ka tuig nga kinahanglan niyang serbisyohan. Nahibulong mo nganong 40 ka tuig ra nga 360 man ka tuig ang kinatibuk-an niyang setensiya?

Kana tungod kay ang siyam ka counts sa reclusion perpetua niya nga silot dungan man niyang giserbisyohan sigun sa atong balaod.

Dali nga gipuntirya sa publiko si Presidential Spokesperson Salvador Panelo nga maoy nagpaluyo niini.

Si Panelo maoy kanhi abogado ni Sanchez. Kusganon hinuong gihimakak ni Panelo nga duna siyay kalambigitan.

Ug tungod sa negatibong reaksiyon sa publiko napugos ang Malakanyang pagluwat og pamahayag pagpaniguro nga dili makagawas si Sanchez.

Dili makiangayon sa pamilya sa mga biktima nga sa dakong kasayon pagawson si Sanchez tungod lang kay kuno kini nagbag-o na. Mas sayon ang pagpakaaron ingnon. Apan ang kamatuoran nga siya pabiling mangtas luyo sa iyang pagtakuban mao ang mga drugas nga nasakmit sulod sa iyang selda. Daghang salamat nga nagpabilin pang sensitibo ang gobyerno sa sentimento sa publiko niining maong kaso.

Ug hinaut nga bisan kanus-a dili malakip sa makapahimulos sa GCTA ang mga konbiktado sa linuog nga krimen.