EDITORYAL - Panginsulto sa China

Maayong kalamboan kini nga sa kataposan naminaw na gyud ang Malacañang sa reklamo ug pagbagulbol sa katawhan apil na sa militar batok niining pagpanginsulto ug pagbiay-biay sa China pinaagi sa walay pananghid nga pagsulod-gawas sa ilang mga barkong panggubat dinhi.

Matud pa sa tigpamaba sa Palasyo nga si Salvador Panelo, namahayag si Pres. Duterte nga dili na niini tugotan ang bisan kinsang mga langyaw nga barkong molawig sa Pilipinas nga walay pananghid.

Si Panelo miingon nga kinahanglang may pagtugot gikan sa mga otoridad sa Pilipinas kining maong mga barko kay kondili mohimo og mga lakang ang gobiyerno batok kanila.

Wala hinuon magpasabot nga gamitan og pwersa ang paghimo niini apan mipasumbingay si Panelo nga ipaagi gihapon sa “unfriendly response” ang pag-abog kanila ug depende sa sitwasyon kun unsay gikinahanglan.

Dako og implikasyon ang pamahayag sa pangulo kay maghatag kini og kaisog sa Philippine Navy ug Philippine Coastguard o bisan unsang ahensya sa gobiyerno nga lutoson kining mga langyaw nga barkong magsulod-gawas dinhi nga way pananghid.

Mensahe sab kini ngadto sa mga langyaw nga mga nasud nga kinahanglan nilang respetuhon ang otoridad sa Pilipinas samtang sila maglawig sa sud sa teritoryo niini.

Apan dili mahingpit ang hugot nga pagbantay sa teritoryo sa Pilipinas kun dili pun-an ang mga gamit sa Coast Watch System sa nasud sama sa mga early warning radars nga napalit pa sa panahon sa administrasyong Aquino. Pinaagi niining maong mga kahimanan, mas makabantay ang mga otoridad sa mga barko o mga abyong pasekretong mosud sa nasud ug magiyahan dayon ang mga nagpatrolyang pwersa pag-intercept kanila.

Samtang wala pay dugang gamit, maayong motabang ang katawhan ilabi na kadtong mga namuyo daplin sa kabaybayonan nga magpakabana ug mosumbong dayon sa mga otoridad kun duna silay makitang katingad-ang mga sakyanan sa dagat.