Mga hugawan ug nagmika

Usa ako sa daghan nga nalipay dihang liboan ang nagkahiusa sa dakong panawagan sa lokal nga kagamhanan alang sa usa ka cleanup drive sa mga nag-unang kasapaan dinhi sa dakbayan sa Sugbo sukad pa sa niaging mga bulan.

Tulo ka dagkong suba sa dakbayan ang bag-o lang gipailalum sa cleanup campaign ning tuiga ilawom sa administrasyon ni kanhi mayor Tomas Osmeña.

Tuod man gatusan ka tonelada nga basura ang nakuha niadtong maong mga pagpanglimpiyo.

Gisundan ang maong cleanup drive didto sa Guadalupe River diin liboan ka volunteer ang mi-participate.

Ug tuod man, 70 ka tonelada nga basura ang nakuha gikan sa maong suba.

Apan maayong pagkasagmuyo ni Mayor Edgardo Labella tungod kay pipila lamang ka adlaw gikan sa ulahing panglimpiyo, nagkatag na usab ang basura sa maong suba.

Kini ang hinungdan nga iyang gipahimangnoan ang mga opisyal sa mga barangay diin naglikos ang maong suba.

Hinuon walay laing mabasol niining maong problema kondili mismo ang mga molupyo nga nagpuyo daplin sa maong suba.

Klaro nga kulang sila sa disiplina kabahin sa unsay insakto nga paghipos sa basura.

Angay unta nga modukdok kanila ang mga opisyal sa barangay gumikan sa ilang pagpataka og labay sa basura.

Apan ang mga opisyal sa barangay mismo kulang sa gahum pagdisiplina kanila.

Angay lamang usab nga mabasol nato kining mga opisyal sa barangay sa ilang pagtinapol pagpitol niadtong mga badlongong molupyo nga sige og labay sa ilang mga basura sa suba sulod sa dugay na nga katuigan.

Karon gisapot na si Labella. Ug angay lamang nga iyang tinud-on paghapos kadtong mga hugawan nga mga molupyo, ug mga opisyales sa barangay nga nagmika sa ilang katungdanan. Atong atangan.