Misteryosong pagkahanaw

Mahiligon kaayo ko og karaan ug gani usa sa mga grasya nga akong nadawat sa dihang nadestino ko dinhi sa habagatang Sugbo mao man nga nakita nako ang mga nindot nga talan-awon sa mga simbahan kang kansang kasaysayan nahipatik sa arkitektural nga bayhon sa mga balay alampoanan ug sa mga kumbento nga gipuy-an sa mga kaparian sulod sa daghang mga siglo.

Gani, mosantop gyud dayon sa akong hunahuna si Santos Gomez de Maranon ang nidesenyo sa mga simbahanan sa Sibonga ug sa Catmon.

Matag sud-ong ko sa maong mga simbahanan, dili ikalimod nga akong mahatag ang akong pagyukbo sa maong obispo.

Apan ang katahum ning mga mga antigo nga gihimong kahimanan sa relihiyosong pagtudlo sa katawhan usahay nahimong tuburan sa tanang tintal kanilang mahiligong mokawkaw sa ilang kaambong.

Mao nga ang halapad nga hawanan sa karaang kumbento, nga kanhiay puno ug lukop sa mga antigong bahandi nahimong hawanan gyud sa tinuoray, sanglit nahanaw man ang mga obra nga pinatud-an og singot sa atong mga katigulangang mga artisan.

Ang tanan, nahanaw daw bula. Misteryo kini ug dili korupsiyon sanglit relihiyosong kaibog man gikan sa relihiyosong kalag ang nakapatukmod nign mga bahing kahoy nga mopanaw ngadto sa laing dapit.

Apan unta angayang masayud ang katawhan nga dili maayong kuhaon nato ang dili atoa.

Supak kini sa latid sa kaangayan. Ihatag kang Cesar ang iya kang Cesar ug ihatag sa Dios ang iya sa Dios.

Sa akong pagduaw sa akong higala, nahimong mas suod ang among panagsalo sa pagkaon niadtong udtoha, salamat na lang kang Saling nga midala sa tanang plato, kutsara ug uban pa.

Lami man diay ang magkinamot labina kun wala na gyud kay kapilian pa.