Pag-modernize sa traffic system

It’s time. Yes, panahon na nga ilisdan kining karaan na kaayong traffic system sa atong dakbayan. Kon buot hunahunaon, dugay na unta kining gihimo sa atong dakbayan, nga kon mahimo kini karon, dako kini nga accomplishment sa present city administration.

Sa niaging Martes, grabe ang suliran sa trapiko sa diha nga ni-malfunction ang traffic system sa dakbayan.

Gikan ko sa hapit-na-mahuman nga Senior Citizens Building (now Financial Center Complex), sa intersection sa mga dalan Jakosalem ug MC Briones, ala- 5:00 sa hapon. Nauli ko sa amo (Guadalajara, Guadalupe) ala-7:00 na sa gabii. Sa ato pa, duha  ka oras nga pag-drive sa duol kaayo nga rota.

Nabara ang tanang kadalanan, ilabi na ang mga eskina sa akong naagian. Sa Don Sergio Boulevard ang tibuok dalan natanggong ang mga sakyanan sulod sa kapin tunga sa oras.

Again, it’s time nga i-modernize na ang atong traffic system. And the time is now. Otherwise magpabilin ang walay-kasulbaran nga suliran sa trapiko.

Gikinahanglan ang P500M nga pundo alang niining maong katuyoan. Daku-dako kini nga kantidad. Hinaut nga dili magpanuko ang atong Konseho paggahin niini. Otherwise, magpugos na usab tingali kita pagpanghuwan.

Giingon dinhi nga kining pag-modernize sa atong traffic light system, usa lamang sa mga priorities ni Mayor Edgar Labella pag-sulbar sa suliran sa trapiko. Ang laing solusyon mao ang pagpahiluna sa usa ka efficient management system sa 80 ka major intersections sa dakbayan.

Dugang niini, gipaabut nga dakung maka-declog sa kadalanan sa dakbayan mao ang gilaraw nga Integrated Inter-model Transports System (IITS) nga sugdan ang pagtrabaho sa dili matapus kining tuiga.

Ang IITS naglangkob sa monorail, bus rapid transport (BRT), ug cable car system. Of course, sama sa mga dagkung infrastructure projects sa gobyerno, ma-realized kini sa dugay-dogay nga panahon. Pagkakaron, kutob lang una kita sa mga press releases, ug pagdamgo.

Apan, maayo na lang. Giingon nga dili gyud ta mohunong sa pagdamgo.  Otherwise mag-atubang kita’g madulom nga ugma.

* * *

Unsa na may nahitabo niadtong giingon nga ang buhatan sa adwana dinhi sa Sugbo ibalik na ngadto sa centuries-old nila nga customs building?

Hinumdoman nga ang customs house gihimong Malacañang sa Sugbo panahon sa pagka-presidente ni karon Rep. Gloria Arroyo. Apan, sa atong nasinati wala gayud kini mo-function as such.

Ug sa katapusang pagduaw ni Arroyo sa Sugbo, giingon dinhi, atong kutluon: “The Bureau of Customs (BOC) will occupy again the Malacañang sa Sugbo (MSS) or the old customs house at Pier 1 in Cebu City.”

Tapus niini, wala na kitay nadunggan nga dugang pamahayag bahin niining pagbalik sa mga buhatan sa adwana ngadto sa karaan nilang building. Matud  ni Arroyo: “It will be used again by the Bureau of Customs.”

Sa mubong kasaysayan nga nahipos sa The Freeman, atong nasayran nga ang customs building gi-design sa usa ka Americanhon, si William Parsons, ug ang pagtrabaho niini natapus sa 1910, ug gigamit isip customs office hangtud nga gihimong Malacañang sa Sugbo ni Arroyo sa 2004.

So, ang pangutana: Mabalik ga gayud kaha kini ngadto sa tag-iya sa maong structure, Ang Bureau of Customs sa Sugbo?