Seryosong problema sa dengue

Mideklara na ang kagamhanan og national epidemic tungod sa dengue nga mihapak sa Pilipinas karon.

Kini human sa grabe nga pagsaka sa mga kaso sa maong sakit sa tibuok nasud gikan sa Enero hangtud niining bulana.    

Halos tanang probinsiya sa nasud adunay natala nga pagsaka sa kaso sa dengue diin daghan usab sa mga biktima ang namatay.

Gani, lakip niining maong mga lalawigan mao ang Sugbo, diin daghan sa mga lugar dinhi ang gisiaw usab sa dengue.

Niining maong seryoso nga problema sa dengue karon, adunay mga sugyot nga ibalik ang pagbakuna sa kontrobersiyal nga Dengvaxia dinhi sa nasud isip kabahin sa kampanya batok sa maong sakit nga misakdap sa nasud.

Gani gikataho nga uyon si Presidente Rodrigo Duterte sa sugyot pagbalik sa Dengvaxia vaccine sa nasud.

Matud niya nga kun makasalbar kini og mga kinabuhi, suportado niya ang pagpabakuna sa kabataan sa Dengvaxia.

Apan matud pa sa usa ka opisyal sa Department of Health, dili gayud magsilbi ang Dengvaxia ug unsa  mang bakuna sa kampanya batok sa dengue karon panahona.

Kini gumikan kay dili man dayon kuno kini moepekto ngadto sa mga nakaangkon sa maong bakuna.

Hinuon, midugang si DOH spokesperson Eric Domingo nga ang Dengvaxia ug uban pang bakuna batok sa dengue siguro dako na og ikatabang aron mapugngan ang unsa mang outbreak o epidemic sa maong sakit sa umaabot nga panahon.

Siguro ang dinaliang pangontra sa pagsulbong sa dengue karon mao ang kanunay nga paghinlo sa palibot aron nga mapusgay ang mga breeding sites sa mga lamok nga nagdala sa dengue virus, ilabina niining panahon sa ting-ulan.

Usahay ang nakaparat mao nga daghan usab ang nagpakabungol lamang sa pahimangno sa gobiyerno kabahin sa kanunay nga paghinlo aron nga kalikayan ang pagdagsa mga lamok.

Mao na nga moresulta na hinuon kini sa dakong problema, sama sa atong nasinati karon nga dengue epidemic sa tibuok nasud.