Tinud-a gyud mayor ha?

Kanindot kun tinud-on ni Cebu City Mayor Edgardo Labella ang iyang pamahayag nga dili na niya pabalikon ang mga sidewalk vendors pagpaninda diha sa mga aseras nga gihawanan na sa mga sakop sa PROBE Team.

Sigurado ko nga mopagakpak niini ang kinabag-ang katawhan kay dili na man sila mahasol sa ilang paglakaw sa aseras.

Malipay usab niini ang mga traffic enforcers kay wala na may maglakaw sa karsada kay nasakripisyo pag-agi sa sidewalk.

Daghan kaayong nalipay nga gihawanan sa PROBE ang pipila ka mga aseras sa downtown area.

Hinoon, nakabantay ko nga usahay kon makatalikod na ang mga sakop sa PROBE Team, mamalik sab dayon ang mga sidewalk vendors.

Angay nga mag-designate lang og mga aseras nga adto sila makapaninda, apan dili maayo nga ang tanan na lang gyud nga aseras, ilabi na ang Colon Street, maoy ilang ukopahon.

Ang uban ra ba niining mga sidewalk vendors hugawan kaayo kay pataka lang og itsa sa ilang mga basura.

Bisan pa og pakalitan ni CESET chief Grace Luardo og susi kun may mga basurahan ba kining maong mga vendors, sigurado ko nga wala. Malooy kita kay panginabuhi nila ang pagpaninda.

Apan ang ila gud nga pagpaninda sa  aseras nakapasamok man sa siyudad.

Unta dili kay kutob ra sa sulti si Mayor Labella sa iyang pag-ingon nga dili na niya pabalikon ang mga sidewalk vendors, kinahanglan nga iya gyud kini nga tinud-on aron dili siya matawag nga bakakon.

* * *

Dili malalis nga daghang senior citizens gikan sa ubang mga dapit  dia na magparehistro ug mobotar sa Dakbayan sa Sugbo aron nga makadawat sila sa gitanyag nga cash assistance sa siyudad.

Dia tuod sila marehistro ug nangangkon nga mga lumolupyo sa Dakbayan sa Sugbo, apan ang tinuod, tua gihapon kini magpuyo sa lainlaing probinsya sa Kabisay-an, ang uban gani tua sa Manila.

Mao kini ang rason nga matag pagpanghatag og cash assistance nga tag P1,000 kada buwan, daghan gyud ang dili makakobra kay alkansehon man sila sa plite nga ang kobrahon nila gamay ra kaayo nga kantidad.

Karon dunay resolusyon si Konsehal Lea Japson nga nag-awhag sa Office of Senior Citizens Affairs (OSCA) nga mosugod na pag-process sa mga applications sa mga senior citizen nga nakabotar niadtong eleksyon sa 2013.

Kun matuman ni, ang 75,028 ka senior citizens nga rehistrado karon sa OSCA, madugangan tingali og mga 15,000 ka seniors, ug ang kantidad nga para sa cash assistance moabot na og kapin sa P1 Billion kada tuig.